सः छगु फरक अभिव्यक्तिया गुक्वःगु ज्याझ्वः
लहनान्युज | गुंलागा दशमी ११३९ (अगष्ट २५ २०१९)
सः छगु फरक अभिव्यक्तिया धइगु मू चु ज्वना न्ह्याका वया च्वंगु साहित्यिक ज्याझ्वःया गुंगुब्वः क्वचाःगु दु ।
लय्लय् पत्तिकं स्वम्ह स्रष्टा पिनिसं बाखं वाचन याना वया च्वंगु थ्व सः छगु फरक अभिव्यक्तिया ज्याझ्वलय् आः तकया दुने नीन्याम्ह साहित्यकार पिन्सं थःथःगु साहित्य वाचन याना दीधुंकुगु दुसाः ज्याझ्वःया गुंगुब्वय् साहित्यकार चिबाखंमि विजयरत्न असंबरे , मानिक उराय व न्हूच्छेभक्त कवांपिन्सं बाखं वाचन यानादीगु खः । लय् पतिकं स्वम्ह स्वम्ह साहित्यकारपिन्सं चिबाखं न्यंका वया च्वंगु थ्व ज्याझ्वलय् छक्वः नांजाम्ह साहितयकार मथुरा सायमिया याकः रचना वाचन जूगु खःसा वयकलं चिबाखं मखसे आधुनिक बाखं न्यंकादीगु खः ।
ज्याझ्वलय् वाचन याःगु चिबाखंयात कया साहित्यकार शाक्य सुरेनं समालोचना यानादीगु खःसा वयकलं चिबाखं धइगु हाकलं चिहाजक जुया मगासे थुके नुगलय् तिक्कमिंक्क थीगु गुन नं दयेमा धका धयादिल ।
ग्वसाः खलःया दुजः साहित्यकार सुघीर ख्वबिं लसकुस न्वचु तयादीगु उगु ज्याझ्वलय् साहित्यकार मोक्षबहादुर अमात्यं उगु ज्याझ्वलय् चिबाखं वाचन यानादीपि. साहित्यकारपिन्त हनादीगु खः ।
अथेहेतुं ग्वसाः खलःया दुजः सुनिल बज्राचार्यं न्हयाकादीगु उगु ज्याझ्वलय् ब्वति कयादीपिं पाहाँपिं मध्ये पुष्पराम मुनंकःमि छम्हेसित गोलाप्रथा याना सिरपा लःल्हागु खः ।
