रत्नताराया ‘उदाय् जातिया संस्कार ज्याःजंक्व’पितब्वज्या
लहनान्युज | कछलागा षष्ठी ११४० (नोभेम्वर १८ २०१९)
नेपालभाषायातःगु सफू च्वयादीधुंकुम्ह रत्नतारा ताम्रकारं च्वयादीगु ज्याःजंक्वबारेया सफू “उदाय् जातिया संस्कार ज्याःजंक्व” सफू पितब्वज्या जूगु दु ।
उदाय् समाजया ज्याथःम्ह १०६ दँ दुम्ह मोतिकृष्ण तुलाधर व त्रैलोक्यमान ताम्रकारं मंकाः कथं पितब्वज्या यानादीगु खः । ज्याझ्वलय् समाजसेवी नेवाः न्ह्यलुवा हितकरवीर सिंह कंसाकारं च्वमि ताम्राकारयात हनापौ लःल्हानादिल ।
विश्व शान्ति अभियानया ग्वसालय् जूगु उगु नेपाल प्रज्ञा प्रतिष्ठानया कुलपति गंगाधर उप्रेती मूपाहाँ कथं झायादीगु खः।
संस्थाया नायः प्रेम नाथ जोशीया सभाध्यक्षताय् जूगु ज्याझ्वलय् उदाय् समाजया पुलांम्ह नायः पञ्चवीर सिं तुलाधर, तवः समाज येँया नायः तेज रत्न कंसाकार, ताम्राकार समाज यलया नायः रविन्द्र ताम्राकार, प्रा. प्रेमशान्ति तुलाधर नुगःखँ तयादीगु खः ।
च्वमि ताम्राकारं थःगु सफू पिथनेगुया आज्जु व च्वय्गु नितिं यानागु अनुभव न्ह्यब्वसे सुभाय् देछानादीगु खःसा ज्याझ्वः सुशीलवीर सिंह कंसाकारं न्ह्याकादीगु खः ।