राणा विरोधी योद्धा मन्त
नृपेन्द्रलाल श्रेष्ठ | सिल्लागा पारु ११४० (फ्रेअवरी १० २०२०)
राणाशासन विरोधी आन्दोलनया योद्धा नाप समाजसेवी सिद्धिबहादुर खड्गी मन्त । ९३ दँ दुम्ह खड्गी थौं चान्ह्य ११ ः ०५ ताः इलय् बल्खुया वयोधा अस्पतालय् निमोनिया वासः याकेगु झ्वलय् मदुगु खः ।
मदुम्ह १९ दिं निसे वासः याक वयाच्वःगु खः । मदुम्ह खड्गी थौं सोमवाः शंखमुलया घाटय् नेवाः परम्परा कथं दाहसस्कार याःगु खः । खड्गीया स्वम्ह काय् व न्याम्ह म्हाय् दु ।
खड्गी १९९७ सालनिसे राणाशासन विरोधी आन्दोनलय् सक्रिय जुयादिम्ह खः। २००७ सालया प्रजातन्त्र पुनःस्थापना निसे २०४६ साल तक राजनीति खइड्गीं महत्वपूर्ण थाय् दु ।
मदुम्ह खड्गी वि सं २०११ जेठ १५ निसे तत्कालीन राजा त्रिभुवनं गठन याःगु सल्लाहकार सभाया सदस्य न जुयादिगु खः ।
न्यादँ न्ह्य मदुम्ह खड्गीयात नेवाः परम्परा कथं स्वक्वःगु ज्याजंकुया झ्वलय् यलय् सार्वजनिक अभिनन्दन याःगु खः ।
उगु ज्याझ्वलय् हेमाङ्गराज गिरीं च्वयादिगु खड्गीया जीवनी व व्यक्तित्व दुथ्याःगु ‘संघर्षशील सिद्धिबहादुर खड्गी’ नां या सफू पिथःगु खः । खड्गी व्यक्तित्वया आधारित वृतचित्र न दयकुगु खः ।
