कोरोना नियन्त्रणका लागि येँ मनपां १० करोडया आकस्मिक कोष स्थापना
नृपेन्द्रलाल श्रेष्ठ | चिल्लाथ्व दशमी ११४०
येँ महानगरपालिकां कोरना भाइरस संक्रमण, रोकथाम तथा नियन्त्रणया लागि १० करोडया आकस्मिक कोष स्थापना यायेगु निर्णय याःगु दु । थौं च्वंगु विशेष कार्यपालिका बैठकं थःथे निर्णय याउगु खः ।
बैठक लिपा याउगु पत्रकार सम्मेलनय् न्ववानादिसे येँ महानगरपालिकाया प्रमुख विद्यासुन्दर शाक्यं १० करोडया आकस्मिक कोष स्थापना यायेगु जानकारी बियादिगु खः । उगु कोषपाखे भाइरस रोकथाम तथा नियन्त्रणया लागि तत्कालयात चिधःगु बिचयाःगु व तधःगु वडाया लागि २ लाख,.३ लाख व ४ लाखया दरं निकाशा बिइगु निर्णय याउगु दु ।
‘कोरना भाइरस रोकथाम तथा नियन्त्रण नाप डेंगु रोग नियन्त्रणया लागि नेपाली तथा नेपाल भाषां पर्चा, पम्पेल्ट, व्यानरपाखे प्रचार सामाग्रीहरु निर्माण एवं वितरण यायेगु निर्णय याउगु खः ।,’ प्रमुख शाक्यं, ‘येँ महानगरपालिका अन्तर्गतया थीथी थासय् स्वास्थ्य जनशक्ति, स्वास्थ्य सामाग्री, प्रचार सामाग्री सहितया हेल्प डेक्सया स्थापना तथा संचालन यायेगु धका धयादिसे महागरपालिका स्थित देगः, सतः, मस्जिद, गुम्वा थेजाःगु धार्मिक, सामाजिक सम्पदाय् हुलमुल मयायेत सर्व साधारणयात इनाप यायेगु निर्णय न उगु वैठकं याःगु दु ।’
मेयर शाक्यं पत्रकार सम्मेलनय् न्ववानादिसे कोरना भाइरस रोकथाम तथा नियन्त्रण सम्वन्धि ज्या प्रभावकारी ढंग न्ह्याकेत येँ महानगरपालिका जनस्वास्थ्य महाशाखा अन्तर्गत फोकल प्वाइन्टया रुपय् २४ सै घण्टा हेल्फ डेक्स सञ्चालन यायेगु न जानकारी बियादिगु खः ।
थीथी सञ्चारमाध्ययम तथा सामाजिक सन्जालपाखे कोरना भाइरस रोकथाम तथा नियन्त्रणया लागि जनचेतना मुलक सन्देश लगातार सम्प्रेषण यायेगु व याकेगु कोरना भाइरस रोकथाम तथा नियन्त्रण ज्या समन्वयात्मक एवं प्रभावकारी ढंग न्ह्याकेत येँ महानगरपालिका अन्तर्गत दुगु नगर तथा वडा स्तरीय विपद् व्यवस्थापन समितियात क्रियाशिल दयेकेगु निर्णय न उगु बैठकं याउगु दु ।
‘कोरना भाइरस रोकथाम तथा नियन्त्रण ज्यायात माःगु ग्वाहालिया निति येँ महानगरपालिया सहकार्यय् संचालित नेपाल एम्बुलेन्स सेवा (१०२) यात उच्च सतर्कताय् तया परिचालन यायेगु निर्णय न जुगु दु ।
अथेहे, येँं महानगरपालिका दुने गन न सभा, सम्मेलन, समारोह यायेत निरुत्साहित यायेगु व थज्याःगु ज्यायात महानगरपालिकां ग्वाहालि मयायेगु निर्णय न याउगु दु । ‘कामपाखे
सञ्चालिन हेल्पडेक्स तथा सार्वजनिक थासय् निशुल्क मास्क व सेनिटाइजर वितरण यायेगु निर्णय न याउगु दु ।
