चाइना फाउन्डेसनपाखें येँ मनपा १७ वडायात ग्वाहालि बिल
नृपेन्द्रलाल श्रेष्ठ | चौलाथ्व पुन्हि ११४०, चैत्र २६
चाइना फाउन्डेसन फर पभर्टि एलिभिएसन व गुडविल फाउन्डेसन नांया नेपाःया निगू चाइनिज फाउन्डेसनं येँया १७ वडाय् ल्हाः सिलेगु स्टेशन दयेकेत सामग्री ग्वाहालि ब्यूगु दु ।
थुगु निगू फाउन्डेसनं येँ महानगरपालिका १७ वडा कार्यालययात २०० लिटरया २०गः ट्याङ्कि व ह्यान्ड वास उपलब्ध याकूगु खः ।
चाइना फाउन्डेसनया नेपाः देय् निर्देशक छि छिखयाङं उगु सामग्रीत येँ मनपा १७ वडाया वडाध्यक्ष नवीन मानन्धरयात लःल्हानादिल ।
उगु ट्याङ्कित १७ वडाया प्रहरी बिट, सामुदायिक अस्पताललिसें थीथी थासय् तयाः ह्यान्ड वास स्टेशन दयेकेगु वडाध्यक्ष मानन्धरं धयादीगु दु ।
अस्पताल डाक्टर तकं गाक्क ल्याखय् मदुगु नेपाः थुज्वःगु विकासोन्मुख देशय् कोभिड १९ संक्रमण न्यनावंसा बांमलाःगु स्थिती वयेफुगु जूगुलिं ल्हाः सिलाः स्वस्थ्य जुइत विपन्न परिवारयात अःपुकेगु लिसें जनचेतनाया नितिं थुगु ग्वाहालि उपलब्ध याकागु चाइना फाउन्डेसनया कन्ट्रि डाइरेक्टर छिं धयादिल ।
उगु इलय् क्षेत्रपाटी निःशुल्क चिकित्सालय अस्पताल संचालक समितिया नायः डा. मनोजमान श्रेष्ठया नं उपस्थिती दुगु खः ।
