लकडाउन वैशाख १५ तक मन्त्रिपरिषदया निर्णय
चौलागा सप्तमी ११४०, बैसाख २ मगलवाः | चौलागा सप्तमी ११४०, बैसाख २ मगलवाः
सरकारं लकडाउन झिंनिन्हु तनाः बैशाख १५ गतेतक यायेगु क्वःछ्यूगु दु । विश्वव्यापी महामारीकथं न्यना वनाच्वंगु कोभिड १९ (कोरोना भाइरस)या संक्रमण पनेगु नितिं चैत्र ११गतेनिसें शुरु याःगु लकडाउन स्वक्वःखुसी तनेगु क्वःछ्यूगु खः ।
नकतिनि जक च्वंगु मन्त्रीपरिषदया मुँज्यां थुकथं क्वःछ्यूगु सीदुगु दु । छवाःया नितिं घोषणा याःगु लकडाउन संक्रमण जूपिं मनूत लुइवं लकडाउनया म्याद नं तनेगु ज्या जुयाच्वंगु खः । कन्हय् बैशाख ३ गते सरकारं घोषणा याःगु लकडाउनया ई फुइगु खः । नेपालय् आःतक १६म्हेसिके संक्रमण खनेदुगु दु । थौं मंगलवाः जक येँया सनसिटी अपार्टमेण्टय् च्वनीपिं निम्हेसिके संक्रमण पुष्टि जूगु खः ।
अथे हे, लकडाउनया हुनिं ज्या मदयाः अलपत्र जुयाच्वंपिन्त स्वनिगलं थःथःगु छेँय् वनेबीगु खः कि धइगु विषयस नं मन्त्रीपरिषदय् सहलह जूगु खः । श्रोतया कथं थुकथं वय् वनेगु ज्या जुल धाःसा लकडाउन फ्यासुइगु जूगुलिं थुकथंया छुट मबीगु नं सरकारं क्वःछ्यूगु दु ।
अथे हे, अन्तर्राष्ट्रिय उडानत बैशाख १८ गतेतक बन्द यायेगु नं सरकारं क्वःछीधुंकूगु दु । थौं हे जःलाखःला देय् भारतं लकडाउन १९न्हुया नितिं तनेगु घोषणा याःगु दु ।
Categorized in राष्ट्रिय
