स्वनिगलय् २ लखं मल्याक्क परिवारयात राहत इन, सवारी प्रवेशय् सेनिटाइजर अनिवार्य
बिराजकाजी राजोपाध्याय | चौलागा चतुर्दशी ११४०,बैसाख ८ गते
स्वनिगःया निगू महानगर व १६ नगरपालिकां लकडाउन ज्वःछि २ लख ११द्वःत्या व २३ परिवारयात राहत इनागु न्ह्यथंगु दु । न्हिं सलंसः नागरिकत न्यासि वनाः हे गामय् लिहां वनाच्वंगु समाचार थीथी सञ्चारमाध्ययमय् वयाच्वंगु इलय् उपत्यका नगरपालिका फोरमं २ लख ११द्वः स्वयां आपाः परिवारयात राहत उपलब्ध याकागु जानकारी ब्यूगु खः ।
स्वनिगःया १८ मध्ये १४ नगरपालिकाया प्रमुखतय् उपस्थितीइ येँया राष्ट्रिय सभागृहस च्वंगु उपत्यका नगरपालिका फोरमया बैठकं थुगु जानकारी ब्यूगु खः ।
‘आःया अवस्थाय् छगू प्रदेशं मेगु प्रदेश, छगू जिल्लां मेगु जिल्ला व छगू स्थानीय तगिमं मेगु स्थानीय तगिमय् वयेवने यायेबलय् संक्रमणया खतरा अप्वइ’ नगरपालिका फोरमया नायः तकं खःम्ह येँ महानगरपालिकाया प्रमुख बिद्यासुन्दर शाक्यं धयादिल, ‘जिमिसं स्वनिगलय् दुपिं अतिविपन्न, असहाय व दैनिक ज्यालादारी यानाः नयेमाःपिं मजदुर लकडाउनया इलय् द्यांलानाः च्वनेम्वाःलेमा धकाः मंकाः पहल यानाच्वनागु दु ।’
सुं नं द्यांलाना च्वनेमाःगु जानकारी वःसा स्वनिगःया जनप्रतिनिधि वा टोल फ्री न. ११८० व ११३१स जानकारी बीत शाक्यं अपील यानादिल ।
प्रमुख शाक्यं लकडाउन इलय् अतिविपन्न, असहाय र दैनिक ज्यालादारीइ ज्या याइपिं मजदुरयात आःतक्क येँ महानगरपाखें जक हे ५०द्वः स्वयां आपाःसित राहत व न्याद्वः स्वयां आपाः प्लेट जा नकेधुनागु जानकारी नं बियादिल ।
स्वगिनःया १८ मध्ये १४ पालिकाया प्रमुखतय् उपस्थिति दुगु बैठकय् मध्यपुर थिमि नगरया प्रमुख लिसें फोरमया सचिव मदनसुन्दर श्रेष्ठं थीथी जिल्लापाखें उपत्यकायात ट्रान्जिट दयेकूगु हुनिं भचा अप्वः समस्या खनेदुगु जुइफुगु विषयस सहलह जूगु जानकारी बियादिल ।
‘१४ पालिकां १ लख ९९द्वःत्या व २३ परिवारयात राहत इनेधुंकूगु खनेदत । थप प्यंगू पालिकां १२द्वः परिवारयात इनागु धाःगु दु’ श्रेष्ठं जानकारी बियादिल ।
मनूया ल्याखं स्वयेबलय् स्वनिगलय् जक हे करीब १० लखयात राहत इनेधुंगु जुइफुगु श्रेष्ठं धयादिल ।
‘थुलि जुलं नं राहतया अभावय् गामय् लिहांवनीपिं अप्वयाच्वंगु धइगु समाचार वयाच्वंगु दु’ वयकलं धयादिल, ‘थ्व धयागु स्वनिगःया हे बासिन्दा स्वयां स्वनिगःयात ट्रान्जिट दयेकूपिनिगु हुनिं ला थथे जूगु मखुला धइगु विषयस जिमिसं गम्भीर जुयाः सहलह यानागु दु । थथे खःसा उकिया समाधानय् नं जिपिं छधी जुयाः जाये ।’
स्वनिगलय् दुपिं असहाय, अतिविपन्न व बेरोजगारं नयेगु अभावय् च्वनेम्वाःलेमा धकाः राहत वितरणयात निरन्तरता बीगु, स्वनिगः दुनेया क्वारेन्टाइन सरकारया मापदण्ड दुने च्वनाः न्ह्याकेगु, माःसा मंकाः पहलय् क्वारेन्टाइन तनेगु लिसेंया विषयस नं बैठकय् सहलह जूगु खः ।
सचिव श्रेष्ठं स्वनिगःया दक्वं नाकां वयेवने जुइगु सवारीयात अनिवार्य सेनिटाइज यायेगु प्रवन्ध यायेगु विषयस नं सहलह जूगु जानकारी बियादिल । साँगा लिसेंया छुं नाकां थ्व ज्या न्ह्यायेधुंकूगु व मेगु नाकां नं याकनं न्ह्याकेगु तयारी दुगु श्रेष्ठं धयादिल ।
Categorized in राष्ट्रिय
