संविधान संशोधन प्रस्तावय् नेवाःतय् सहलह
लहनान्यूज सम्वाददाता | थिंलाथ्व पारु ११३७ (नोभम्बर ३० २०१६)
संसदय् सरकारं दर्ता याःगु संविधान संशोधन विधेयक प्रस्तावयात कयाः नेवाः जागरण मंचं सहलह मुँज्या याइगु जूगु दु ।
मंचं संविधान संशोधन विधेयक प्रस्तावय् नेवाः सरोकार क्यनेत थुगु सहलह मुँज्या यायेत्यनागु धाःगु दु । मुँज्या थ्वहे वइगु थिंलाथ्व चतुर्थी (मंसीर १८ गते) शन्चरबाः येँय् जुइत्यंगु दु ।
संविधान संशोधनया नामय् केन्द्रीत जुयाच्वंगु आःया राजनीतिइ नेवाःतयगु दृष्टिकोण दयेकेगु नितिं उगु ज्याझ्वः यायेत्यनागु मञ्चं न्ह्यथंगु दु । ज्याझ्वलय् नेवाः प्रदेशया प्राप्तिया आन्दोलनया नितिं क्रियाशिल नेवाः न्ह्यलुवापिंलिसें नेवाः कार्यकर्तातयगु उपस्थिती दइगु नं मंचं धाःगु दु ।
मंचया मंगलवाः च्वंगु मुँज्यां संविधान संशोधनया प्रस्ताव दर्ता लिपा नेवाः राजनीतिया मुद्दा, पहिचान सहितया संघीयता व संवैधानिक रुपं नेवाः अधिकारया सुनिश्चिततायात कयाः थीथी ज्याझ्वः यायेगु निर्णय जूगु जानकारी ब्यूगु दु ।
मंचं सन्चरबाःया ज्याझ्वलय् पहिचान पक्षधरलिसें नेवाः हक अधिकारया नितिं क्रियाशील सकलसित ब्वति कायेत आव्हान नं याःगु दु ।
Categorized in राजनीति
