येँ महानगरं लकडाउनया इलय् ८० हजारयात राहत इने धुकल
नृपेन्द्रलाल श्रेष्ठ | बछलाथ्व नवमी ११४०,बैसाख २० सनिवाः
लकडाउन इलय् येँ महानगरपालिका अतिविपन्न, असाहय व मजदुरयात न्हि न्हि जा नकेगु ब्यवस्था याना वयाच्वंगु दु । महानगरपालिकाया थःगु हे स्रोत व थीथी ग्वाहालिं संघ–संस्था तयेगु कुतलय् आतक ८१ हजार स्वया अप्वो राहत इने धुकुगु दु । अथेहे आतक छगु लाख हाराहारी मनू तयेत जा नकेगु धुकुगु दु धका येँ महानगरपालिकां जानकारी बिःगु दु ।
येँँ महानगरपालिकाया मेयर बिद्यासुन्दर शाक्यं लकडाउनया कारण सिर्जना जुगु थज्याःगु थाकुगु परिस्थितिइ स्थानीय सरकारपिन्स थः थःगु क्षमता फुगु राहत वितरण व जा नकेगुे लगायतया नाप नाप मेमेगु प्रयास न जुया च्वंगु धका धयादिगु दु ।
‘महानगरपालिका दुने च्वपि असाहय, अतिविपन्न व बेरोजगार तयेत नयेगु अभाव जुपिन्त राहत वितरण नाप जा नकेगु ब्यवस्था याना वयाच्वनागु दुु धयादिसे,’ मेयर शाक्यं, ‘लकडाउनया इलय् सु न महानगर च्वपिं द्यालाना च्वने म्वालेमा अज्यापि सु न दु सा जनप्रतिनिधिपिन्त जानकारी बियादिस इमिगु जिम्मेवारी जिमिस कायेत तयार दु ।’
इमित लकडाउनया इलय् द्यालाना च्वने म्वालेमा धका परोपकारी संस्था नाप सहकार्य याना नयेगु ब्यवस्था यानागु दु धका जानकारी बियादिगु खः । गुलि थासय् थः न वना अनुगमन यानागु दु । छु दिं न्ह्य अथेहे निरिक्षणया लागि चःमती वना मेयर शाक्यं स्थानीय नाप च्वना ज्यःना यानादिगु खः ।
महानगरपालिकाया प्रशासन विभागया प्रमुख नमराज ढकालं महानगरपालिका दुने सु न द्या लाना च्वने म्वालेम्वा धका राहत वितरण नाप अथे जा नकेगु थीथी वडाय् याना वयाच्वनागु दु धका जानकारी बियादिगु खः। ‘लकडाउन सुरु जुसा निसे आतक महानगरपालिका थःहे न मेपि थीथी दातापि नाप समन्वयय् याना करीव ८२ हजार राहत वितरण याये धुनागु दु व १ लाख मनूत तयेत नयेगु ब्यवस्था याये धुकगु दु धका धयादिगु दु ।
आतक याःगु तथ्याङ्क कथं ६ नम्बर वडाय् जक २५ हजार स्वया अप्वो पिन्स जा नकेगु ब्यवस्था याये धुकुगु दु । १४ वडाय् १९ हजार मनू तयेत जागरण बस्ती सुधार संघ, सामूदायिक टोल सुधार समिति लगायतपिनिगु समन्वयय् याना नकेगु ब्यवस्था जुगु दु ।
३ वडाय् न्हि निद्ध मनूतय्त बोधिसतुवा बिहार नाप अव्यबस्थित बस्ती जुपि परिवार, टिचिङ् हस्पिटल महाराजगञ्ज व कान्ति बाल अस्पतालय् भर्ना जुपि बिरामीया कुरुवा तयेत नकेगु
ब्यवस्थ यानागु धका वडाध्यक्ष दिपक केसीं जानकारी बियादिगु खः ।
येँ महानगरपालिकाया प्रवक्ता नाप वडा–१५ या अध्यक्ष इश्वरमान डंगोल न थःगु वडाय् झीं खुसः मनू तयेत नकेगु ब्यवस्था याना वयाच्वनागु जानकारी बियादिगु दु । ‘१५ वडाय् भूँइख्यः,
चःमती, बुद्धपार्क, जनगल्ली विजयश्वरी याना प्य थाय् नका वया च्वनागु दु धका,’ प्रवक्ता डंगोल धयादिगु दु।
सहरी विकास राज्यमन्त्री रामवीर मानन्धरया कुतलं महानगरपालिकाया थीथी थाय् बाइपासया तरुण मावि, गंगाहल नाप होलीगार्डेन स्कुल नाप, बाइसधारा स्विमिङ पुल लिउने, वनस्थली खरिबोट, सानोभर्याङ, म्हपी द्यःया थाय् व नयाँबजारया सासा बैंक्वेटय् नकेगु ब्यवस्था याना च्वनागु दु धका मन्त्री मानन्धरं जानकारी बियादिगु दु ।
अथेहे, महानगरया १७ वडाया लुँति अजिमा द्यःया थाय् न बहनि नकेगु ब्यवस्था याना वया च्वंगु दु ।
१८ वडाय् २ हजार व २७ वडाय् ३ हजार, ५ वडाय् २ हजार, ८ वडाय् पसुपति विकास क्षेत्र कोष नाप समन्वयय् याना न्यासः मनू तयेत नका वयाच्वंगु दु । कोटेश्वर समाज सुधार युवा क्लव, सेती ओपी क्लव कोटेश्वर समन्वयय् याना ३२ वडाय् न्ह्यसः मनू तयेत व २२ वडाय् उपकार सेवा समितिया कुतल न्युरोडय् न सच्छिम्ह स्वया अप्वो मनू तयेत नकेगु ब्यवस्था याना वय च्वंगु दु ।
