संघीय सरकारयात मेयर शाक्यया इनाप–‘स्वनिगः वयेवनेगुलिइ कडाई याये’
शोभा श्रेष्ठ | बछलागा षष्ठी ११४०,बैसाख २९ गते
सर्लाहीया मलङ्गवां छगः सरकारी गाडी येँ २३ वडा ओमबहालय् वल । गाडीं छम्ह मिसा थः काय् व म्ह्याय् लिसें कुहांवल । स्थानीयं न्यनेकने याःबलय् उखेपाखे जोखिम अप्वःगुलिं येँय् वयागु धाल ।
प्रदेश २ अन्तर्गत सामाजिक विकास मन्त्रालयया बा २ झ २४१३ नम्बरया गाडीइ च्वनाः वःपि) उपिं ओमबहालय् थःथितिया डेराय् च्वंवःगु खः । स्थानीयं विरोध यायेधुंकाः उपिं अनं येँ महानगरपालिका वडा–२२ या वतु त्वालय् वन ।
वतुइ नं सकिसनं विरोध यायेधुंकाः येँ महानगरपालिका वडा–२२ या वडाध्यक्ष चिनीकाजी महर्जनया समन्वयस उमित जिल्लाय् हे लित छ्वयाबिल ।
महानगरीय प्रहरी वृत्त जनसेवाया डीएसपी सुनिलजंङ शाहं जनप्रतिनिधिया समन्वयस उमित उमिगु हे जिल्लाय् सकुसल लित छ्वयागु जानकारी बियादिल ।
येँ महानगरपालिक वडा–१८या अध्यक्ष न्हुच्छेकाजी महर्जनं बालं च्वनीपिं व थौंकन्हय् जक पिनं स्वनिगलय् दुहांवःपिं मनूतयत म्ह्वतिं च्यान्हु क्वारेण्टाइनय् तयाः आरडीटी परीक्षण धुंकाः जक दुहांवयेत व थुकियात परिपालना यायेत याकेत इनाप यासें सुचं सामाजिक सञ्जालपाखें सार्वजनिक यानादिल ।
येँ महानगरपालिका वडा–२ या अध्यक्ष राजेन्द्र श्रेष्ठं नं कामपा वडा न.२ लाजिम्पाटया थीथी थासय् स्वनिगलं पिन वःपिन्त सचेत याकुसें सुरक्षित च्वनेत इनाप यासें भिडियो हे सार्वजनिक यानादिल ।
कोरोना भाइरसया संक्रमण न्यंकेमबीत सरकारं जारी याःगु लकडाउनया अवज्ञा यासें स्वनिगलं पिहांवंपिं गुलिखे मनूत शक्तिया बलय् वा सुलाः सुलाः हाकनं दुहांवयाच्वन धइगु तथ्य च्वय्या सन्दर्भं नं प्रष्ट याः ।
गुलिखे मनूत ला थीथी नाकां बिरामीया त्वहः तयाः एम्बुलेन्सं हे स्वनिगलय् दुहांवयेगु यानाच्वंगु दु ।
स्वनिगलय् छन्हुं हे स्वम्ह संक्रमित खनेदयेधुंकाः स्वनिगःबासीतयत थारान्हुइका ब्यूगु दु ।
थ्व लिसें थन जोखिमया स्थिती दुगु खँ प्रमाणित जूगु बिचाः उपत्यका नगरपालिका फोरमया नायः तकं खःम्ह येँ महानगरपालिका प्रमुख विद्यासुन्दर शाक्यं प्वंकादिल ।
कोरोना भाइरसया संक्रमण न्यंकेमबीत सरकारं न्ह्याकातःगु लकडाउनया पूर्ण पालना मजूगु हुनिं जोखिमया खतरा अप्वःगु कामपा प्रमुख शाक्यया धापू दु ।
‘थज्याःगु अवस्था वयेफुगु आँकलनलिसें उपत्यका नगरपालिका फोरमं कोभिड–१९ सम्बन्धी उच्चस्तरीय समन्वय समितिया कजि तकं खःम्ह उपप्रधान अले रक्षामन्त्री ईश्वर पोखरेलयात नापलानाः स्वनिगः दुने निर्वाध वयेवनेयात कडाई यायेमाःगु माग तयेधुनागु खः । तर, कडाइ लिसें कार्यान्वयन जुइमफुबलय् स्वनिगलय् नं कोरोना संक्रमण न्यनीगु खःला धइगु चिन्ता अप्वःगु दु’ शाक्यया धापू दु ।
वय्कलं लकडाउनया उल्लङ्घन यानाजुइगु खःसा संघीय सरकारं तकं नियन्त्रण याये मफइगु अवस्था ब्वलनेफु धासें स्थानीय, प्रदेश व संघीय सरकार गम्भीर जुयाः कडाई लिसें कार्यान्वयनपाखे केन्द्रित जुइमाःगुलिइ बः बियादिल ।
‘जिमिसं सुरुनिसें हे स्वनिगलं वयेवने जुइगुलिइ कडाई यासें थनया चहलपहलयात छ्वासकुेमाः धयावयागु खः’ शाक्यं धयादिल, ‘तर, सरकारी गाडी व पासया तकं दुरुपयोग यासें याउँक स्वनिगलय् दुहांवयेगु ज्या मद्यूगु जानकारी वःगु दु । आः नं झी सचेत मजुइगु खःसा अवस्था नियन्त्रण्ं पिहांवनेफु ।’
छुं थाकूगु परिस्थिती दथुइ नं ताः इलंनिसें स्वनिगःबासीं लकडाउनया पूर्ण पालना यानाः ग्वाहालि याःगु धासें अझं छुं ई धैर्य यायेत नं शाक्यं इनाप यानादिल ।
‘अझं छुं ई छि गन दु, अन हे च्वनादिसँ । थुकिं महामारी नियन्त्रणय् ग्वाहालि जुइ,’ वयकलं धयादिल, ‘छुं मनूया असहयोग स्वनिगलय् भयावह जुइफु । स्वनिगः वयेवनेगुलिइ कडाई याये । जिं हाकनं संघीय सरकारयात इनाप यानाच्वना ।’
Categorized in राष्ट्रिय
