कोभिडनाप ल्वायेत दक्कोसिगु सहकार्य आवश्यक : मेयर शाक्य
नृपेन्द्रलाल श्रेष्ठ | तछलाथ्व अष्टमी ११४०,जेठ १६ गते

भरपर्दो सुरक्षा सामाग्री मदया ज्यान जोखिम तया संक्रमितपिनिगु उपचारयात निरन्तर खटे जुया वयाच्वपि चिकित्सकपिन्त येँ महानगरपालिकां झीस्वसः पाः ग्वाहालि याःगु दु ।
येँ महानगरपालिकाया मेयर बिद्यासुन्दर शाक्यं नेपाल मेडिकल काउन्सीलया अध्यक्ष डा. भगवान कोइराला व नेपाल चिकित्सक संघया अध्यक्ष डा. लोचन कार्कीयात मंकाः कथं ज्याकेट हस्तान्तरण यानादिगु खः । उगु ज्याया लागि क्षत्रपाटी निःशुल्क चित्किसालयया अध्यक्ष डा. मनोजमान श्रेष्ठ संयोजन यानादिगु खः ।
राष्ट्रिय सभागृहय् ज्याकेट हस्तान्तरण यानादिसे मेयर शाक्यं कोविड–१९ थे ज्यागु अदृष्य शत्रु नाप ल्वायेगु लागि थःगु ज्यान जोखिमय् तया संक्रमित पिनिगु उपचारय् निरन्तर खटे जुया च्वपि चिकित्सकपिन्त महानगरपालिकापाखे थ्व चिधःगु ग्वाहालि याये दया थःत तसक लसता वःगु खँ न्ह्यथनादिगु खः । ‘न्हिया न्हिथं संक्रमितपिनिगु ल्याः अप्वः जुया वया दु धका धयादिसे
थज्यागु इलय् अग्रमोर्चामाय् च्वना ज्या याना वयाच्वपि चिकित्सकपिनिगु मनोबल थकायेगुु लागि संक्रमितपिनिगु वासः यायेत सकसिगु ग्वाहालि माःगु खँय् बः बियादिगु दु ।
मेयर शाक्यं ‘छिकपिनिगु ज्ञान–सीपया उच्चतम सदुपयोग यायेगु ई थ्व हे खः धयादिसे थज्यागु ग्वाहालि व सहकार्य नाप समन्वय याना वनेत येँ महानगरपालिका तयार दु धका धयादिगु खः ।
मेयर शाक्यं मेगु थाय् स्वया येँय् तुलनात्मक रुपं शान्त दुगु थ न चालिस लाख स्वया अप्वो जनसंख्या दुगु स्वनिगलय् संक्रमण फैले जुलकि भयावह अवस्था सिर्जना जुइगुलि स्वनिगलय् च्वपिन्त थप सचेतना फैले यायेत चिकित्सकपिनिगु न तधःगु भूमिका दइ धका धयादिगु दु ।
नेपाल मेडिकल काउन्सीलया अध्यक्ष डा. भगवान कोइरालां संयमता अपने यायेगु व अप्वो चिउता मकायेगु खःसा कोरोनापाखे यक्को तक बचे जुइफइ धका धयागिदुगु खः ।