येँ महानगरंया झिलिमिली ज्याझ्वः
नृपेन्द्रलाल श्रेष्ठ | दिल्लाथ्व षष्ठी ११४०,असार १३ सनीवाः
न्हिया न्हिथं फरक–फरक प्रकारया आन्दोलन, धर्ना, अनशन जुइगु थाय् माइतीघर मण्डलाया पहिचान हे फरक दयेकुगु दु ।
आः माइतीघर मण्डलाय् मनमोहक दृष्य स्वये खने दइ । येँ महानगरपालिकां ‘रात्रिकालिन सहरी सौदर्य कार्यक्रम’ या नमूना परीक्षणया लागि उगु थासय् ‘एलइडी कलर पाइप लाइट’ जडान याना बहनि उगु दृष्य स्वये खनिगु जूगु दु ।
येँ महानगरपालिकाया सह–सचिव राजेश्वर ज्ञवाली सहर सौदर्य दयकेत येँ महानगरपालिकां बहनि झिलिमिली खने दयेकेत ‘एलइडी कलर पाइप लाइट’ जडानया ज्याझ्वः न्ह्याकुगु दु धका धाःगु दु । ‘यक्को चहल–पहल जुइगु व आवत–जावत न यक्को जुइगु थाय् माइतीघर मण्डलाय् न्हापां नमूना परिक्षणया रुपय् थुगु ज्याझ्वः न्ह्याकागु खँ धका,’ ज्ञवाली धयादिगु दु ।’
सह–सचिव ज्ञवालीें माइतीघर मण्डलाय् नमूना परिक्षणया रुपय् न्ह्यने यकागु धका धयादिसे येँयात बिश्वस्तरीय तधःगु सहरया आकर्षक क्यनेत वइगु दिं यक्को चहः पहः दइगु धार्मिक,
पर्यटकीय व सम्पदासूचिइ सूचिकृत जूगु थासय् थज्यागु मत तया वनिगु जुइ धका धयादिगु दु ।
महानगरं गन थम्हेसया गन निजी क्षेत्रया सामाजिक उत्तरदायित्वया रुपं थज्यागु मत तयेगु ज्या जुया वनि धका धयादिगु दु ।
येँ महानगरपालिकां थुगु दँया नीति तथा कार्यक्रमय् येँ महानगरय् दुने प्रमुख चोकय् आधुनिक सिग्नलाईज्ड प्रणालीइ आधारित ट्राफिक मत जडान याना ट्राफिक व्यवस्थापनय् थप सहज व व्यवस्थित दयेकेगु, मेयर उज्यालो कार्यक्रमयात प्रभावकारी रुपं न्ह्यने वनेगु, मुख्य चोकय् हाइमास्ट मत जडान यायेगु लगायतया लक्ष्य तया तःगु दु ।
