अनलाइन कक्षा हान सञ्चालन जुइगु
लहनान्युज | गुंलाथ्व द्धितीया ११४०,साउन ७ बुधवाः
निजी विद्यालय सञ्चालकपिन्स थीथी माग तया अवरुद्ध याना वयाच्वंगु अनलाइन कक्षा हान सञ्चालन जुइ त्यःगु दु ।
निजी तथा संस्थागत विद्यालय अर्गनाईजेसन (प्याब्सनश), एनप्याब्सन, नेपाल अभिभावक महासंघ, राष्ट्रिय अभिभावक महासंघ व संस्थागत विद्यालय शिक्षक युनियनं कन्हय साउन ८ गते निसे अनलाइन कक्षा न्ह्याकेगु निर्णय याःगु दु ।
थ्व हे वइगु १ भदौ निसे जक विद्यार्थी भर्ना व परीक्षा सञ्चालन याये दइगु सरकारं निर्णय पुनर्विचार यायेत मंकाः रुपं याये धुकुगु अनलाइन कक्षा सञ्चालन यायेगु निर्णय यानागु धका एनप्याब्सनया अध्यक्षं धाःगु दु ।
विद्यालय सञ्चालक, शिक्षक व अभिभावक संघ तत्काल विद्यार्थी अभिलेखीकरण, सफू वितरण, न्हुगु भर्ना लगायतया क्रियाकलाप यायेत शिक्षा, विज्ञान तथा प्रविधि मन्त्रालय नाप इनाप याःगु दु ।
थुकिया लागि, शिक्षा मन्त्री गिरीराजमणि पोखरेलं विद्यालय पुनः सञ्चानया विषयय् प्याब्सन, एनप्याब्सन, अभिभावक महासंघ व शिक्षकपि नाप मन्त्रालय नाप छलफल याःगु खः ।
प्याब्सन व एनप्याब्सनं १ साउन निसे अनलाइन कक्षा बन्द याःगु खः ।
