किपुली खाद्य सडक दयेकेगु सुरु
नृपेन्द्रलाल श्रेष्ठ | गुंलाथ्व १३ ११४०, साउन १७ गते
किपू नगरपालिकां वडा नं. ४ व ९ लाःगु फय्खा नगरया लँया जवंखवं सिमा पिना नगरयात खाद्य सतक दयेकेगु ज्या नगरपालिकां न्ह्याकूगु दु । किपू नगरपालिकां आर्थिक बर्ष २०७७ व ७८या नीति तथा ज्याझ्वलय् किपू नगरयात हरित सतक व खाद्य सतक दयेकेगु अवधारणा दुथ्याका तःगु खः ।
थज्याःगु अवधारणा हःगु नेपाःया हे दकलय् न्हापांगु किपू नगरपालिकां थुकिया सुरुवात यासें वृक्षारोपण ज्या न्ह्याकूगु खः । किपू नगरपालिकाया मेयर रमेश महर्जनं तेबूमा पिनाः उगु वृक्षारोपण ज्याझ्वःया सुरुवात यानादीगु खः ।
अथेहे उपमेयर सरस्वती खड्का, वडा नं. ४ या अध्यक्ष राजेन्द्र बानियाँ, ९ वडाअध्यक्ष गंगाराम महर्जन, १०वडाअध्यक्ष अमन महर्जन नाप वडा सदस्यपि व स्थानीयपिन्स सिमा पिउगु खः । तेजपात व तेबूया १५० म्ह सीमा उगु थाय् बिउगु खः । थुगु सिमा राष्ट्रिय वनस्पति उद्यान गोदावरीं उपलब्ध याकूगु खः ।
वृक्षारोपण ज्याझ्वलय् थःगु नुगःखँ तयादिसें राष्ट्रिय वनस्पति उद्यान, गोदावरीया कार्यालय प्रमुख दिपक लामिछानें नगरयात खाद्य सतक दयेकेगु न्हूगु सोच हःगुलिं कीपू नगरपालिकायात सुभाय् देछायादीगु खः ।
