येँ महानगरपालिकां स्थानीय विषयया पाठ्यक्रम तयार यात
नृपेन्द्रलाल श्रेष्ठ | गुंलाथ्व १३ ११४०, साउन १७ गते
येँ महानगरपालिका दुनेया फुक्क संस्थागत व सामुदायिक ब्वनेकुथिइ ब्वनाच्वंपिं विद्यार्थीपिन्सं आः अनिवार्य रुपं १०० पूर्णांकया स्थानीय विषयया पाठ्यक्रम ब्वनेमालीगु जूगु दु ।
येँ महानगरपालिकां न्हापांगुखुसि थनया म्हसीका व संस्कृतिबारे जानकारी बिइगु आज्जुं स्थानीय विषयया पाठ्यक्रम तयार यायेधुंकाः विद्यार्थीपिन्सं उगु पूर्णांकया पाठ्यक्रम ब्वनेमालीगु जूगु खः ।
महानगरपालिका क्षेत्र दुने लाःगु फुक्क संस्थागत व सामुदायिक ब्वनेकुथिइ कक्षा १ निसें ८ कक्षातक पठन पाठन याकेगु नितिं महानगरपालिकां स्थानीय विषयया पाठ्यक्रम तयार याःगु खः ।
येँ महानगरपालिका दुने ९२ गू सामुदायिक ब्वनेकुथिमध्ये ८६ गू साधारण ब्वनेकुथि, ३ गू विशेष व ३ गू विद्यालय बन्दीपिनिगु लागि दु । संस्थागत ब्वनेकुथिया ल्याः ६४० गू दु । आः उगु फुक्क ब्वनेकुथिइ कक्षा १ निसें ८ कक्षातक १०० पूर्णांकया स्थानीय विषयया पाठ्यक्रम पठन पाठन जुइ ।
येँ महानगरपालिकां थःगु क्षेत्र दुने हनीगु व न्यायेकीगु नखः चखः, संस्कार संस्कृति, सीप कौशल, व्यवसाय, नैतिक शिक्षा, भौगोलिक प्राकृतिक स्वरुप, स्वास्थ्य व सुचुपिचु, रहनसहन, व्यक्तित्व म्हसीका, भाषा व लिपिथें जाःगु विषय बारे म्हसीका बिइगु व स्यनेगु ब्वंकेगु आज्जुं थुज्वःगु पाठ्यक्रम तयार याःगु जानकारी ब्यूगु दु । स्थानीय सरकार नीस्वनेधुंकाः राज्यया नीति अनुरुप हे स्थानीय विषयया पाठ्यक्रम स्थानीय सरकारपाखें हे निर्माण यानाः लागू यायेत्यंगु नं महानगरपालिकां जानकारी ब्यूगु दु ।
पाठ्यक्रम तयार यायेत महानगरपालिकां नीस्वंगु पाठ्यक्रम समितिया कजि डा. चुन्दा बज्राचार्यं धयादीगु दु, पाठ्यक्रम स्थानीय भाषा नेपालभाषाया माध्यमं पठनपाठन जुइ । कक्षा १ निसें ८ कक्षातक पठनपाठन याकेत महानगरपालिकां नेपालभाषापाखें तयार याःगु पाठ्यक्रम महानगरपालिकाया शिक्षा समितिपाखें पारित यायेगु चरणय् दु । पाठ्यक्रम पारित जुइखतं उकिया हे आधारय् पाठ्य पुस्तक नं तयार जुइ ।
डा. बज्राचार्यं मचातय्त सयेके अःपुइमाः धैगु आज्जुं १ निसें ३ कक्षातक १०० पूर्णांकय् १०० हे अभ्यासगत पठनपाठन जुइगु जानकारी बियादीगु दु ।डा. चुन्दा बज्राचार्यं धयादीगु दु, कक्षा ४ व ५ य् ७५ अभ्यासगत व २५ सैद्धान्तिक पठनपाठन जुइ । कक्षा ६, ७ व ८ य् धाःसा ५० अभ्यासगत व ५० सैद्धान्तिक पठनपाठन जुइगु व्यवस्था यानागु दु ।
येँ महानगरपालिकाया ७ क्वःगु नगरसभां स्थानीय पाठ्यक्रम अन्तर्गत स्थानीय महत्वया विषयत बारे महानगरवासीपिन्त परिचित याकेगु आज्जुं स्थानीय भाषापाखें हे पठनपाठन यायेगु निर्णय यायेधुंकूगु दु ।
डा. बज्राचार्यया कथं येँया रहनसहन व जनजीवन थनया स्थानीय भाषाय् जीवन्त दइगु जूगुलिं थुकिया पाठ्यक्रम नं स्थानीय नेपालभाषां हे तयार याःगु खः ।
डां बज्राचार्यं धयादीगु दु, यःमरी, मरुहिति, क्वहिति, थँहिति इत्यादी थेंजाःगु रैथाने खँग्वःत मेगु भाषां थुइके फइमखु । उगु खँयात थुइकेगु जक मखु कि विद्यार्थीपिन्सं उकियात आत्मसात् तकं यायेफयेमाः धैगु आज्जुं उज्वःगु थाय् बाय्या अवलोकन भ्रमण लिसें स्थानीय भाषां हे ब्वंकेगु निर्णय जूगु खः ।
पाठ्यक्रम समितिया मेम्ह दुजः वरुणप्रसाद वैद्यं पाठ्यक्रम नेपालभाषां तयार याःगु जूसां नं उकिया सिकाई अतिकं सरल जुइग्ु जूगुलिं थ्व न्ह्याम्ह शिक्षकं नं ब्वंकेफइगु धयादीगु दु ।
थुकी विद्यार्थीपिन्त अवलोकन व अभ्यासया माध्यमपाखें ब्वंकेगु विषय आपालं दूगुलिं पठनपाठनय् छुं समस्या मवइगु जानकारी नं बैद्यं बियादीगु दु ।
वैद्यं धयादीगु दु, थ्व विषय ब्वंकेत जिमिसं शिक्षकपिन्त छगू तालिम नं बिइगु जुइ । तालिम कायेधुंकाः न्ह्याम्ह शिक्षकं नं अःपुक ब्वंकेफइ । येँ महानगरपालिका शहरी योजना आयोगया दुजः गुजेश्वरी श्रेष्ठं थ्व विषय भाषासिबे. नं येँया म्हसीकाय् केन्द्रीत जुइगु धयादीगु दु ।
श्रेष्ठं धयादीगु दु, येँय् बसोबास याइपिं मनूतय्त येँया संस्कृति, सम्पदा, रहनसहन, जनजीवन बारे परिचित याकेगु थुकिया मू आज्जु खः । थुगु विषयत ब्वब्वं व स्यस्यं हे भाषा नं स्वतः सयेके फइगु जूगुलिं थुकी छुं समस्या वइमखु । पाठ्यपुस्तक नेपालभाषां च्वयातःगु जूसां नं शिक्षकं आवश्यकता कथं खस नेपाली व अंग्रेजी भाषां नं विद्यार्थीपिन्त थुइकेगु यायेफइ ।
श्रेष्ठं पाठ्यपुस्कतकयात ग्वाहालि याइगु मेगु बहुभाषी पाठ्य हलंज्वलंत महानगरपालिकां पिथनेत्यंगु जानकारी नं बियादिल ।
येँ महानगरपालिका शिक्षा विभागया शाखा अधिकृत मोती भट्टराई नं येँया कला संस्कृति, सम्पदा संरक्षण यायेगु आज्जुं थुगु पाठ्यक्रम हःगु जानकारी बियादिलसा वय्कलं थ्व येँ महानगरपालिकाया नीतिगत निर्णय जूगु धासें सामुदायिक व नीजि ब्वनेकुथि फुक्कलिसे सहलह यानाः मछिं मजुइगु कथं न्ह्यःने वनेगु धयादिल ।
भट्टराई नं धयादीगु दु, येँया संस्कृति व सभ्यतायात गथे खः अथेहे थुइकेत थनया हे भाषा छ्यःसां अःपुइगु जुइ । थुकिं येँप्रति अपनत्व अप्वइगु जूगुलिं येँ महानगरपालिकापाखें नीतिगत
रुपं हे थ्व निर्णय जूगु खः ।
स्थानीय विषय नेपालभाषापाखें ब्वंकेगु महानगरपालिकाया थ्व निर्णयप्रति येँया थीथी ब्वनेकुथिया प्रधानाध्यापकपिन्सं नं सकारात्मक प्रतिक्रिया ब्यूगु दु । स्वनिगलय् दकले अप्वः विद्यार्थी दूगु चर्चित सामुदायिक ब्वनेकुथि ज्ञानोदय माध्यमिक विद्यालयया प्रधानाध्यापक नातीकाजी महर्जनं येँया कला संस्कृति, सम्पदा, भाषा, लिपिबारे जानकारी बिइगु थ्व विषय येँ पिनेपाखें वयाः थन ब्वनाच्वंपिं विद्यार्थीपिनिगु नितिं तःधंगु अवसर जुइगु धयादीगु दु । नोवेल एकेदेमिया कोअर्डिनेटर शोभाकर भण्डारीं ब्वनेकुथिइ आः नं येँया जात्रा पर्वतय्गु बारे अध्ययन अध्यापन जुयाच्वंगु खँ नं कनादीगु दु ।
