अन्तर्राष्ट्रिय बौद्ध ध्यान केन्द्र निर्माणय् राज्यमन्त्री मानन्धरया च्युता
नृपेन्द्रलाल श्रेष्ठ | गुंलागा ३ ११४०,साउन २२ बिहीवाः
शहरी विकास राज्यमन्त्री रामवीर मानन्धरं यलया नख्खइ मंगलमार्ग अन्तर्राष्ट्रिय बौद्ध ध्यान केन्द्र निर्माणया लागि सरकारं माःगु ग्वाहालि यायेगु प्रतिबद्धता यानादिगु दु ।
ध्यान केन्द्रय् थौं अवलोकन यानादिसे राज्यमन्त्री मानन्धरं बालाम्ह मनू जुइत ध्यानया महत्वपूर्ण भूमिका दु धका धयादिसे ‘ध्यानं मनू न मनू म्हसिगु व थःगु मनयात नियन्त्रण याये फइ धका धयादिगु खः । थज्यागु अभ्यासयात व्यापक दयेके माःगु व थुगु भवन निर्माणया लागि राज्यं माःगु ग्वाहालि यायेगु धका धयादिसे’ राज्यमन्त्री मानन्धरं विहार निर्माणया प्रस्तावना मन्त्रालयय् पेश यायेत इनाप यानादिगु खःसा वया लिपा सरकारं माःगु ग्वाहालिया लागि गृहकार्य न्ह्यने यकेगु धका धयादिगु खः ।
उगु ज्याझ्वलय् केन्द्रया अध्यक्ष रामकाजी अवालें बहुजन हिताय व बहुजन सुखायया लक्ष्य तया थुगु ध्यान केन्द्र भवन दयेकेगु लागि न्ह्यने वनागु थुगु भवन दयेकेगु लागि सरकारपाखे महत्वपूर्ण ग्वाहालि उपलब्ध याइगु विश्वास प्वका दिगु खः ।
अथेहे केन्द्रया उपाध्यक्ष अजरमान जोशींसे भवन निर्माणया प्राविधिक पक्षबारे जानकारी बियादिसे केन्द्रया स्वगू ब्लक दयेकेगु लागि स्वगू करोड ध्यवा लागत अनुमान यानागु धका धयादिसे उकि मध्ये छगू भवन संघीय सरकारं दयेका बिइगु लागि राज्यमन्त्री मानन्धरयात इनाप यानादिगु खः । बुद्ध जन्ममूभी नेपालय् बुद्धया ध्यान व ज्ञानया अभ्यास याकेगु केन्द्रं निर्माण याये त्यःगु थुगु भवन राष्ट्रिय व अन्तर्राष्ट्रियस्तरय् नेपालयाःगु छ्र्यः धस्वाइ धका उपाध्यक्ष जोशी धयादिगु खः ।
उगु ज्याझ्वलय् केन्दया महासचिव सुनील महर्जनं विहार निर्माणया पृष्ठभूमी व कोषाध्यक्ष रामकृष्ण महर्जनं नख्खु खुसिइ न्ह्यने करिडोर निर्माणय् वःगु समस्या बारे मन्त्रीयात ध्यानाकर्षण यानादिगु खः ।
म्यानमारया प्रसिद्ध ध्यान गुरु भिक्षु प्रज्ञाश्रीया ध्यान व ज्ञान अध्यास यायेगु झ्वलय् व मदुम्ह दोलेन्द्ररत्न शाक्यया नियमित धर्मचर्चापाखे प्रभावित जूया पूर्णचण्डी निवासी दशलाल डंगोल व राममाया महर्जनं स्वदँ न्ह्य १ रोपनी १ आना जग्गा दान बियादिगु खः ।
