नेकपाया सचिवालय बैठक आइवाः जक जुइगु
लहानान्युज | अनलागा २ ११४०,असोज १७ सनिवाः
सत्तारूढ दल नेपाल कम्युनिस्ट पार्टी नेकपाया सचिवालय बैठक हाकन कन्ह्यया लागि सरे जुगु दु। थौं न्हिनय् ४ बजे बालुवाटारय् च्वने धाःगु बैठक कन्हय च्वनेगु धका नेकपां धाःगु दु।
पार्टी दुने मन्त्रिपरिषद पुनर्गठनया तयारी व राजनीतिक नियुक्तिया विषयय् विवाद जुया च्वंगुलि सचिवालय बैठक सतूगु खः। प्रधानमन्त्री नाप पार्टी अध्यक्ष ओलीं पार्टी नाप सहलह मयासे मुख्यसचिव नाप स्वम्ह राजदूत नियुक्ति याःगु धाःसे नेकपाका शीर्ष नेतापि असन्तुष्ट जुगु खः।
थ्व स्वया न्ह्यः स्थायी कमिटी निर्णय व सचिवालयया सहलह कथं राजनीतिक नियुक्ति व मन्त्रिपरिषद् पुनर्गठनया लागि ठोस मापदण्ड दयेकेगु विषयय् पार्टीया कार्यकारी अध्यक्ष पुष्पकमल दाहाल प्रचण्ड नाप सहलह जुया च्वंगु इलय् प्रधानमन्त्री ओलीं राजनीतिक नियुक्ति सम्बन्धी महत्वपूर्ण निर्णय याकचा जक याःगुलि नेतापि असन्तुष्ट जूगु खः।
सरकारं वःगु बिहिवाः शंकरदास बैरागीयात मुख्य सचिव नियुक्त याःगु खःसा पूर्व अर्थमन्त्री युवराज खतिवडायात अमेरिका, निवर्तमान मुख्यसचिव लोकदर्शन रेग्मीयात बेलायत व कपिलवस्तुया डाक्टर निर्मलकुमार विश्वकर्मा यात दक्षिण अफ्रिकाया लागि राजदूत सिफारिस याःगु खः।
Categorized in राजनीति
