शहरी विकासमन्त्रीं संसदभवन, मन्त्री निवासय् निरीक्षण
नृपेन्द्रलाल श्रेष्ठ | कौलागा पारु ११४०,कार्तिक १६ आइतवाः
शहरी विकास मन्त्री कृष्णगोपाल श्रेष्ठं थौं सिहदरबार दुने दयका च्वंगु संघीय संसद भवन व यलय् भैसेपाटीइ दयेका च्वंगु संघीय मन्त्री, प्रदेश मुख्यमन्त्री व प्रदेश प्रमुखया आवास भवन दय्काच्वं थाय् अवलोकन याःगु दु। शहरी विकास मन्त्रालय अन्तर्गत गौरबया आयोजना अवलोकन यायेगु झ्वलय् मन्त्री श्रेष्ठं निगु न थासया संरचना अवलोकन याःगु खः।
शहरी विकास तथा भवन निर्माण विभाग अन्तर्गत विशेष भवन निर्माण आयोजना समन्वय कार्यालयया अन्तर्गत दयेका च्वंगु संघीय संसद भवन व मन्त्री, मुख्यमन्त्री व प्रदेश प्रमुखया आवास भवनया प्रगतिबारे जानकारी कायेत मन्त्री श्रेष्ठ दयेका च्वंगु थासय् वंगु खः। अवलोकन यायेगु झ्वलय् मन्त्री श्रेष्ठं क्वछिःगु हे इलय् निर्माण सम्पन्न यायेत निर्देशन बिःगु खः।
मन्त्री श्रेष्ठं गुणस्तरय् छु न कमी कमजोरी मयासे क्वछिःगु इलय् हे निर्माण यायेत सरकारं न्ह्यागु कथंया ग्वाहालि यायेत तयार दु धका धयादिगु खः। जि थ्व आशा तयागु दु कि संघीय संसदया लिपागु बैठक थुगु भवनय् च्वने दइ–संघीय संसद भवनया अवलोकन यायेगु झ्वलय् अथे धयादिगु खः।
संघीय संसद भवन आयोजनाया प्रमुख प्रकृण तुलाधरं कोभिड संक्रमणया कारण निर्माण सम्पन्न यायेत छु भचा लिबागु धका धयादिगु खः। अय्न क्वछिःगु हे यलय् निर्माण सम्पन्न यायेगु कम्पनीयात दबाव बिइ धुकागु दु धका धयादिगु खः। वयकलं निगु सिफ्ट याना २४ घण्टा यायेगु तयारी जुयाच्वगु धका धयादिगु खः।
शहरी विकास मन्त्रालयया सचिव डा. रमेशप्रसाल सिंहं गुणस्तरय् छु न कम्परमाइज मयासे योजना न्ह्यने वना च्वंगु दु धका धयादिगु खः। प्रधानमन्त्री केपी ओलीजुया कार्यकालया संसदय् लिपागु बैठक च्वने जिइक ज्या जुया च्वंगु खँ न्ह्यथसे ठेकेदार कम्पनीयात निर्देशन बियावया च्वनागु दु धका धयादिगु दु।
शहरी विकास तथा भवन निर्माण विभागया महानिर्देशक मणिराम गेलालं कोभिडया कारण ज्याय् छु समस्या वःगु स्वीकार यासे आः न्ह्यागूं परिस्थिति न ज्या निरन्तर रुपं न्ह्यावनइ धका प्रतिबद्धता व्यक्त यानादिल।
सिहदरबारया पुतली बगैचाय् १७३ रोपनी क्षेत्रफलय् प्रतिनिधि सभा, राष्ट्रिय सभा, अति विशिष्ट व्यक्तिपिनिगु कार्यालय भवन, संसदीय दल, समिति, सचिवालय, चमेनागृह व प्रिन्टिङ प्रेस भवन दु। उगु थासय् ७ सय सवारी पार्किङ यायेगु व्यवस्था दु।
मन्त्री श्रेष्ठं प्रधानमन्त्रीजु शिलान्यास यानादिगु स्वगू परियोजना वयकया हे कार्यकालयय् तयार जुइ कथं तिब्रगतिइ ज्या न्ह्यावनेत जोड बियादिगु खः।
Categorized in राजनीति
