नेपाल कम्युनिष्ट पार्टी (नेकपा) या प्रचण्ड–माधव समूह न प्रधानमन्त्री केपी शर्मा ओलीयात पार्टी अध्यक्षपाखे हटे यानागु धका आधिकारिक जानकारी निर्वाचन आयोगयात बिःगु दु।

नेकपा स्थायी कमिटी सदस्य लिलामणि पोखरेलं प्रधानमन्त्री ओलीयात पार्टी अध्यक्षपाखे हटे याना माधवकुमार नेपालयात अध्यक्ष दय्कःगु धका बिहीवाः निर्वाचन आयोगय् दर्ता यानागु जानकारी बिःगु खः। ७ गते पुसय् बबरमहलय् च्वंगु नेकपा प्रचण्ड–माधव समूहया केन्द्रीय समिति बैठकं ओलीयात अनुशासनया कारवाही यायेगु निर्णय याःगु खः।

४४१ म्ह मध्ये ३१५ म्ह केन्द्रीय सदस्यपिनिगु उपस्थितिइ च्वंगु बैठकं ओलीयात कारवाही यानागु धका जानकारी आयोगयात बिःगु खः । ओली पक्ष धाःसा बबरमहल बैठकय् गुटया भेला जक खः धका धाःगु खः। प्रचण्ड–माधव समूहया पार्टी न वैधानिकता सम्बन्धी माःगु सहलह यायेत राजेन्द्र पाण्डे, मुक्ति प्रधान, कृष्णभक्त पोखरेल, टीकाराम भट्टराई, गोविन्द बन्दी व खिमलाल देवकोटायात जिम्मेवारी बिःगु पौ निर्वाचन आयोगय् बिःगु खः ।

Categorized in राष्ट्रिय