पारस फर्मय् लिहांवल
लहनान्यूज | चौलागा षष्ठी ११३७ (अप्रिल १७ २०१७)
धनगढिइ न्ह्यानाच्वंगु धनगढि प्रिमियर लीग (डिपिएल) क्रिकेटय् निक्वःतक्क डकआउट जूम्ह पारस खड्कां थौं कासाय् पुनरागमन यासें टिमयात प्ले अफतक्क थ्यंकाब्यूगु दु ।
थौं पारस खड्काया दमदार ब्याटिङया ग्वाहालिं रुपन्देही च्यालेञ्जर्सयात बुकाः टिम चौराहा धनगढी प्रिमियर लिगया प्ले अफय् दुहांवंगु खः ।
सेती अञ्चल प्रहरी ज्याकूया ख्यलय् जूगु कासाय् रुपन्देहीं ब्यूगु ९२ रनया हाथ्या चौराहां ११ आभेर दुने ४ विकेटया क्षतिइ ल्हातय् लाकल । टिमयात त्याकाबीत कप्तान पारसं २१ बलय् २ छक्का व ७ चौकाया ग्वाहालिं ४२ रनया योगदान बिल ।
एपेण्डिक्सया शल्याक्रिया धुंकाः कासाय् लिहांवःम्ह पारसं बांलाःगु कासा क्यने मफयाच्वंगु खः । थौं लिगय् सर्वाधिक स्कोर दयेकाः थः फर्मय् वयेधुनागु छुमा पारसं क्यंगु दु ।
चौराहाया लागिं राजु रिजाल व अमर रौतेलां १३/१३ रन दयेकल । अनिल मण्डलं ८ रन दयेकूगु इनिङय् पृथु बास्कोटा १५ व आरिफ शेख ४ रनय् अविजित जुल ।
थ्वयां न्ह्यः टस त्याकाः न्हापां ब्याटिङ याःगु रुपन्देहीं मुक्कं ओभर म्हिताः ६ विकेटया क्षतिइ ९१ रन दयेकूगु खः । बांमलाःगु कासा म्हितूगु रुपन्देहिया नितिं ७गूगु ल्याःया ब्याट्सम्यान प्रकाश केसीं धाःसा ३४ बलय् ३ छक्का व ४ चौकाया ग्वाहालिं ४९ रनया योगदान ब्यूगु खः ।
चौराहाया ललित राजबंशीं ४ ओभर २ मेडनलिसें ५ रन बियाः ४ विकेट काःगु खः ।
थौंया कासालिसें धनगढी प्रिमियर लिगया क्वालिफायर समीकरण पूवंगु दु । लिगया शीर्ष थासय् रुपन्देही च्यालेञ्जर्स, निगूगु थासय् बिराटनगर किङ्स व स्वंगूगु थासय् काठमाडौं गोल्डेन्स दु ।
बुधबाः जुइगु क्वालिफयर चरणया रुपन्देही व बिराटनगर दथुइया कासाया त्याकामि फाइनलय् थ्यनी । बूगु टिमं काठमाडौं व चौराहा दथुइया त्याकामिलिसे फाइनल दुहांवनेगु नितिं म्हिती ।
Categorized in कासा
