रोटरी दँ २०१९–२० या पुरस्कार शिवाकोटी व रिजालयात
लहानान्युज | सिल्लाथ्व अष्टमी ११४१, फागुन ८ सनिवाः
रोटरी इन्टरनेशनल डिष्ट्रिक्ट ३२९२ नेपालं दँय्दसं चूलाकावःगु ‘रोटरी जर्नाे अवार्ड’ पत्रकारिता पुरस्कार रोटरी दँ २०१९–२० या नितिं १३म्ह पत्रकारयात चूलाकुगु दु ।
येँय् म्हिगः जूगु ज्याझ्वस ७गू हे प्रदेशया छम्ह छम्ह याना न्हेम्ह उत्कृष्ट व शिक्षा, स्वास्थ्य, आर्थिक, वातावरण लिसें मिसा अले मस्त लिसेंया खुगू विधाय् मदिक्क च्वसा न्ह्याकुपिं ६ म्ह पत्रकारयात म्हतिं २५द्वः राशीया उगु सिरपाः चूलाकुगु खः ।
अथेहे रोटरी इन्टरनेशनल डिष्ट्रिक्ट ३२९२ नेपालं बसु रोटरी भोकेशनल सुशासन अवार्ड हाम्राकुरा डटकमया सम्पादक अजयबाबु शिवाकोटी व आर्थिक दैनिकया सम्पादक प्रल्हाद रिजालयात बिउगु दु ।
शिवाकोटी व रिजालयात रोटरी दँ २०१९–२० लसता लाका ्न्यागू लख ध्यबा नापं अवार्ड बिउगु खः ।
दँय्दसं छम्हसित बियावःगु एकमुष्ट १०गू लख ध्यबाया उगु अवार्ड रोटरी दँ २०१९–२० य् निम्ह पत्रकारयात बिउगु खः ।
रोटरी इन्टरनेशनलया नायः शेखर मेहता, ललितपुर महानगरपालिका मेयर चिरिबाबु महर्जन लिसेयापिन्सं सिरपाः राशी व हनापौ लःल्हानादीगु खः ।
विधागत कथं आर्थिक विधां ईकागज डटकमया पुष्पराज आचार्य, वातावरणं अन्नपूर्ण पोष्टया टिका बन्धन, शिक्षापाखेया न्यूज कारोबार डटकमया दिपेन्द्रप्रसाद सिंह, स्वास्थ्यपाखे रेडियो सगरमाथाया सम्झना महर्जन, नेपाल टेलिभिजनया विनिता रिजालयात अवार्ड बिउगु खः ।
अथेहे प्रदेश नम्बर १ पाखें विनु तिमल्सिना, प्रदेश २ या श्याम बन्जरा, बाग्मती प्रदेशया कमला हमाल, गण्डकीपाखें दीपेन्द्र श्रेष्ठ, लुम्बिनीं लक्ष्मी आचार्य, कर्णालीं भीमबहादुर सिंह व सुदुरपश्चिमपाखें उन्नति सिंहयात अवार्ड बिउगु खः ।
अथेहे रोटरी गतिविधि प्रवद्र्धन याःगुलिं दृष्टि साप्ताहिकया सम्पादक शम्भु श्रेष्ठयात नं अवार्ड लःल्हागु दु ।