सेना दिवसया लसताय् नेपाली सेनां कवाज न्ह्यब्वल
लहनान्यूज | सिल्लागा त्रयोदशी ११४१, फागुन २७ विहीबाः
नेपाली सेनां महाशिवरात्रि एवं सेना दिवस देययंक थीथी ज्याझ्वः याना हंगु दु । शिवरात्रि व सेना दिवसया लसताय् सैनिक मञ्च टुँडिखेलय् जूगु बढाइँ कवाजलिसें विशेष समारोहलय् राष्ट्रपति विद्यादेवी भण्डारी, प्रधानमन्त्री केपी शर्मा ओलीलिसें विशिष्ठ अतिथि पिनिगु ब्वति दूगु खः ।
समारोहलय् राष्ट्रपतिपाखें नेपाल एकीकरणया इतिहास, नेपालया ऐतिहासिक गढी, किल्ला व युद्धस्थलया म्हसिका व सिपाही वार्षिक–२०७७ लोकार्पण यानादिल ।
अथेहे ‘फ्रि–फल जम्प’य् न्हाप व ल्यू लापिन्त सिरपा बियादीगु खः । सैनिक मञ्च, तिन्ख्यलय् मू समारोह व देययंकया सेनाया दक्व ज्याकू, विभाग, फर्मेशन, पृतना, बाहिनी, युनिट व सव–युनिटं पिन्सं नं थःथःगु लागाय् थीथी ज्याझ्वः याना सेना दिवस झःझः धायेक हंगु खः । नेपाली सेनां निगू दशक न्ह्यःनिसें महाशिवरात्रिया दिंसं सेना दिवसया कथं हनावयाच्वंगु दु ।
सैनिक मञ्चय् परेड व तोप बढाइँ, कवाजलिसें थीथी तजिलजि कथं ज्याझ्वः न्ह्याकूगु खः । ज्याझ्वलयः राइफल व तोपं बढाइँ कवाज, त्रिभुवन आर्मी क्लबया कासामी व राष्ट्रिय सेवा दलया क्याडेटलिसें थीथी युनिटं मार्चपाष्ट, बख्तरबन्द गाडी, ल्वाभः थेंजाःगु इक्युप्मेन्ट प्रदर्शन याःगु खः ।
राष्ट्रिय गौरवया सतक दयेकेगु आयोजना, राष्ट्रिय निकुञ्ज लिसें वन्यजन्तु आरक्षण व विश्वशान्ति स्थापनाय् ब्वःति लिसें विपद् व्यवस्थापनसम्बन्धी थीथी गतिविधिया झाँकी तक्कं न्ह्यब्वःगु खः ।
