रोनाल्डो कायम यात दक्वःलय् आपा गोल याःम्ह
चौलाथ्व द्धितीया ११४१, चैत्र २ गते सोमबाः
क्रिष्टियानो रोनाल्डों औपचारिक कासाय् दक्वःलय् आपा गोल याःम्ह कीर्तिमानी कायम याःगु दु । थुगु कीतिमानीलिसें फुटबलया महान कासामि पेलें वयेकयात भिन्तुनादीगु दु ।
थ्वयान्ह्यः थुगु कीर्तिमान पेलेया नामय् दूगु खः । रोनाल्डों इटालियन सिरी ए फुटबल अन्तर्गत वंगु चान्हय् काग्लिएरीलिसे जूगु कासाया सुरुया ३२गू मिनेट दुने ३गू गोल याःगु खः ।
वय्कया थःगु कासा जीवनय् थ्व नापं ७सः व ७०गू गोल जूगु दु । थ्व पेलें कासा जीवनय् याःगु सिवें ३गू गोल अप्वः खः । वयेकलं थःगु कासा जीवनय् ७ व ६७ गू गोल याःगु खः । छुं प्रतिवेदनय् थुकियात विश्व कीर्तिमान नं धाःगु दु ।
तर चेक फुटबल एसोसिएसनं धाःसा दक्वःलय् आपा गोलकर्ताया कीर्तिमान अस्ट्रिया व चेकोस्लोभाकियाया पूर्व स्ट्राइकर जोसेफ बिकानया नामय् दूगु दावी यानावःगु दु । बिकानं ८सः व २१गू गोल याःगु दाबी चेक फुटबल एसोसिएसनया दु ।
तर रेकस्पोर्ट स्कोरया तथ्यांकय् धाःसा बिकानं कासा जीवनय् ८सः व ५गू गोल याःगु उल्लेख यानातःगु दु । तर वयेकलं याःगु २७गू गोल औपचारिक अन्तर्राष्ट्रिय कासाय् याःगु गोल धाःसा मखु ।
थुकिं याना वयेकया औपचारिक गोल ल्याः ७सः व ५९गू जूवइ । रोनाल्डों पेलेप्रति थःगु असीमित सम्मान व आदर दूगु धाःगु दु ।
Categorized in कासा
