इंग्लिस क्लब चेल्सी यूईएफए च्याम्पियन्स लिगया क्वाटरफाइनलय्
चौलाथ्व पंचमी ११४१, चैत्र ५ बिहीवाः
स्पेनिस क्लब एटलेटिको म्याड्रिडयात बुकाः इंग्लिस क्लब चेल्सी यूईएफए च्याम्पियन्स लिगया क्वाटरफाइनलय् दुहांवंगु दु ।
घरेलु मैदान स्टामफर्ड ब्रिजय् वंगु चान्हय् जूगु कासाय् स्पेनी टोलीयात २–० गोलं बुकाः चेल्सीं समग्रय् ३–० या जित दर्ता याःगु खः । चेल्सीं न्हापांगु लेगय् १–० या जित ल्हातय् लाकेधुंकाः निगूगु लेग नं त्याकेत हाकिम जिएच व एमर्सन पाल्मेरीं १–१ गोल यात ।
कासाया ३४ मिनेटय् टिमो वेर्नरया पासय् जिएचं गोल याःगु खः । चेल्सीइ प्रशिक्षक थोमस टुचेलया आगमनलिसें टोली कासाय् लिहांवःगु दु । टुचेलं म्हितकूगु १३ कासामध्ये अपराजित दुगु टोलीं ११ कासाय् १ गोल नं नःगु मदुनि ।
थुखे ला लिगाया शीर्ष थासय् दुगु एटलेटिको धाःसा च्याम्पियन्स लिगं पिहां वनेधुंकाः आः रियल म्याड्रिड व बार्सिलोनायात ल्यूने लाकाः लिग उपाधि त्याकेगु ताकय् दु । लिपांगु दशकय् निक्वः फाइनल थ्यंगु टोली थुगुसी क्वाटरफाइनलय् नं थ्यनेमफुत ।
अथे हे, वंगु चान्हय् हे जूगु मेगु कासाय् साविक त्याकामि जर्मन क्लब बायर्न म्युनिखं इटलीया क्लब लाजियोयात २–१ गोलं बुकूगु दु ।
न्हापांगु लेग ४–१ गोलं त्याकूगु बार्यन निगूगु लेगय् नं कासा त्याकूगुलिसें क्वार्टरफाइनल दुहांवनेत ताःलाःगु दु । थ्वयां न्ह्यः रियल मड्रिड व म्यानचेस्टर सिटी नं क्वार्टरफाइनलय् थ्यनेधुंकूगु दु ।
Categorized in कासा
