थ्रि नेसन्स कप फुटबल धेंधेंबल्लाय् थौं नेपालं किर्गीस्तान लिसे म्हितिइगु
चिल्लाथ्व एकादशी, ११४१, चैत्र १२ विहीबाः
येँय् न्ह्यानाच्वंगु थ्रि नेसन्स कप फुटबल धेंधेंबल्लाय् थौं नेपालं किर्गीस्तानलिसे म्हितेत्यंगु दु ।
त्रिपुरेश्वरस्थित दशरथ रंगशालाय् सनिलय् ५ ता त्या इलय् न्ह्याइगु कासाय् नेपाःया सिनियर राष्ट्रिय टोलीं किर्गीस्तानया २३दँ क्वयेय्या टिमलिसे म्हितेत्यंगु खः । धेंधेंबल्लाय् ग्वसाःखलः नेपाःया थ्व न्हापांग ुकासा खःसा किर्गीस्तानया निगूगु कासा खः । वंगु मंगलबाः जूगु उलेज्या कासाय् किर्गीस्तान बंगलादेशलिसे १–०या गोल अन्तरं बूगु खः ।
धेंधेंबल्ल्लाया फाईनलय् थ्यनेत उमित थौंया कासा त्याके हे माःगु दबाब दु । तर घरेलु मैदान व समर्थकया साथ चूलागु नेपाः विरुद्धया कासा किर्गीस्तानया नितिं अपुइगु धाःसा खनेमदु ।
धेंधेंबल्लाया नितिं म्हिगः जक किरण चेम्जोङया कप्तानीइ २३म्ह दुजःया नेपाली टोली घोषणा याःगु दु । गोलकिपर दीप कार्की, डिफेन्डर निशान खड्का, छिरिङ ुरुङ, मिडफिल्डर त्रिदेभ गुरुङ व सन्जोग राई न्हापांखुसिइ टिमय् लाःगु दु ।
राष्ट्रिय टिमकया नियमित फरवार्ड नवयुग श्रेष्ठ, जर्ज प्रिन्स कार्की, डिफेन्डर देवेन्द्र तामाङ व सन्तोष तामाङ टिमं पिने लाःगु दु । नेपाःया टिमय् लायेत ताःलापिं कासामिलय् विकेश कुथु, दीप कार्की, रंजित धिमाल, निशान खड्का, रोहित चन्द, अनन्त तामाङ, दिनेश राजवंशी, अजित भण्डारी, बिराज महर्जन व छिरिङ गुरुङ दु ।
अथेहे मिडफिल्डरय् त्रिदेभ गुरुङ, सुजल श्रेष्ठ, तेज तामाङ, एरिक विष्ट, सन्जोग राई, विशाल राई, सुनिल बल, रबि शंकर पासवान दुसा फरवार्डय् अन्जन विष्ट, दर्शन गुरुङ, अविशेक रिजाल व भरत खवास दु ।
