शताब्दी पुरुष सत्यमोहन जोशीया नामय् ब्वनेकू निस्वनिगू
राम डंगोल | चिल्लागा द्धितीया ११४१, चैत्र १७ मंगलवाः
सरकारं वाङ्मय शताब्दी पुरुष सत्यमोहन जोशीया नामय् “सत्यमोहन जोशी माध्यमिक विद्यालय” निस्वनिगु जूगु दु । राष्ट्रपति विद्यादेवी भण्डारीया इच्छाकथं जोशीया नामय् ब्वनेकू दयेकेत शिक्षा मन्त्रालयं तयारी न्ह्याकूगु खः ।
मंगलबार वय्कया निवासय् थ्यंका शिक्षा, विज्ञान लिसें प्रविधि मन्त्री कृष्णगोपाल श्रेष्ठं सरकारं यानाच्वंगु तयारीबारे न्ह्यथंगु खः । वइगु आर्थिक दँनिसें ज्या न्ह्याइगु कथं तयारी जूगु मन्त्री श्रेष्ठं धयादिल । ब्वनेकूया नितिं बाँलागू थाय्या ल्यज्या नं जुयाच्वंगु वय्कलं धयादिल ।
“सत्यमोहन जोशी माध्यमिक विद्यालय” यात नमूना ब्वनेकूया कथं निस्वनेगु मन्त्रीं धयादिल । जोशीया कथं ब्वनेकूया मू लुखाय् जोशीया पूर्णकदया झ्वाता तयेगु व प्यखेरं पूmलबारी नं दयेकेगु धयादिल ।
संस्कृतिविद् जोशीं सरकारया योजनाप्रति लसना प्वंकुसें ल्यूनालानाच्वंगु वर्ग दुथाय् ब्वनेकू दयेकत इनाप यानादिल । “जिं कला, साहित्य, संस्कृति यानागु योगदानया कदर याना हुलाक टिकट, सिक्का दयेकूगुलि गौरव तायेका”, वय्कलं धयादिल, “म्हो हे मनुतय्सं म्वाम्वाकं हे सरकारं याःगु सम्मान थ म्वानाच्वंगु इलय् हे ग्रहण यायेफई । जि उकिमध्ये छम्ह ला, आ जिगु नामय् निस्वनेत्यंगु ब्वनेकू नं स्वयेफइ धैगु आशा दु ।”
यलः महानगरपालिकाया प्रमुख चिरिबाबु महर्जनं सरकारं जोशीयात याःगु हनेज्यांं महानगरपालिकाया समेत शान अप्वःगु धयादिल । यलः महानगरपालिकां जोशीया सम्मानकथं पुच्वःनिसें ग्वार्काे तक्कया सतकयात सत्यमोहन जोशी मार्ग नामाकरण यायेगु ज्या लिपांगु झ्वलय् थ्यंगु महर्जन न्ह्यथनादिल ।
