विश्वकप फुटबल युरोपेली छनौट
चिल्लागा चर्तुर्थी, ११४१, चैत्र १९ गते विहीबाः
साविक त्याकामि फ्रान्संं विश्वकप फुटबल छनौट कासाय् बोस्निया हर्जगोभिनायात १–०या गोल अन्तरं बुकुगु दु । बोस्नियायात उमिगु हे मैदानय् बुकेत फ्रान्साय एन्टोनियो ग्रेजम्यानं निर्णायक गोल याःगु खः ।
थुगु हे पुचःया मेगु कासाय् युक्रेन व काजखस्तानं १गू–१गू गोलया ज्वलिन्ज्वः म्हितुगु दु । उखे पुचः ‘आई’ या कासाय् इग्ल्याण्डं पोल्याण्डयात २गू–१गू या गोल अन्तरं बुकुगु दु ।
थुगु हे पुचःया मेगु कासाय् हंगेरीं एण्डोरायात ४गू–१गू या गोल अन्तरं बुकुबलय् अल्बानियां सान मारिनोयात २–०या गोल अन्तरं बुकुगु दु ।
विश्वकप छनौट अन्तर्गत युरोपेली पुचः ‘बी’ या कासाय् स्पेनं कोसोभोयात ३गू–१गू या गोल अन्तरं बुकुबलय् ग्रिस व जर्जियां १गू–१गू गोलया ज्वलिन्ज्वः कासा म्हितुगु दु ।
अथेहे पुचः ‘सी’ या कासाय् इटालीं लिथुआनियायात २–०या गोलं बुकुबलय् बुल्गेरिया व नर्दन आयरल्याण्डं गोल मयासें ज्वल्ज्विः कासा म्हितुगु दु । पुचः ‘जे’या कासाय् उत्तरी मेसेडोनियां जर्मनीयात स्तब्ध याःगु दु ।
फुटबलया महाशक्ति राष्ट्र जर्मनीयात उमिगु हे मैदानय् ऐतिहासिक जित पिकायेगु झ्वलय् उत्तरी मेसेडोनिया २–१गूया गोल अन्तरं त्यागु खः । थुगु पुचःलय् ३गू कासां ६ गू ल्याः मुंगु जर्मनी ३गूगु थासय् कुहाँवंगु दु ।
शिर्ष थाय्या अर्मेनियाया ९गू ल्याः जूगु दुसा उत्तरी मेसेडोनिया ६गू ल्याः नापं निगूगु थासय् थ्यंगु दु । विश्वकप छनौटय् वंगु चान्हय् डेनमार्क, स्कटल्याण्ड, अर्मेनिया, आइसल्याण्ड व इजराइल नं त्यागु दु ।
Categorized in कासा
