२०७२ सालया तःभुखाचं पाताः जुइक दुंगु मरुसतः अर्थात काष्ठमण्डप पुनर्निर्माण लिपांगु चरणय् थ्यंगु दु ।

चान्हि यानाः न्ह्यानाच्वंगु मरुसतःया पुनर्निर्माणया ज्या लक्षित इलय् धाःसा सिमधइगु जूगु दु । काष्ठमण्डप पुनर्निर्माण समितिं याःगु ज्याझ्वलय् पुनर्निर्माणय् झ्वलय् आःतक्कया प्रगति न्यंकुसें ज्या क्वचाय्त भचा लिबाइगु जानकारी ब्यूगु खः ।

समितिया कजि लिसें वागमति प्रदेश सांसद राजेश शाक्यं मरुसतः पुनर्निर्माणयात माःगु सिँ माक्व ल्याखय् आपुर्ति मजूगु हुनिं ज्या छुं भचा लिबाइगु जानकारी बियादिल ।

सिँ आपुर्ति अझ सहज जुइगु लकस दयावंसा पुनर्निर्माणया ज्या याकनं हे क्वचाइगु खँय् शाक्यं बः बियादिल ।

येँ महानगरपालिकाया हे ग्वाहालिं जुयाच्वंगु पुनर्निर्माणया झ्वलय् लकडाउन व निषेधाज्ञाया इलय् दथुइ ज्या द्यूसां स्वास्थ्य मापदण्डयात ध्यानय् तयाः ज्युतल्ले ज्या मदिकुसें ज्या न्ह्याकातयागु नं शाक्यं धयादीगु दु ।

Categorized in राष्ट्रिय