नेकपा एमालेया प्यम्ह प्रदेशसभा सदस्यं फ्लोर क्रस यायेवं कर्णाली प्रदेशया मुख्यमन्त्री महेन्द्रबहादुर शाहीया पद बचे जुगु दु।

थम्हेसिया प्रदेशसभाय् विश्वास दु धका मुख्यमन्त्री शाहीं तःगु प्रस्तावय् पक्ष २२ मत वःगु खः। प्रस्तावया विपक्षय् १५ मत जक वःगु खः ।

मतदानय् प्रदेशसभाया ३९ सांसद मध्ये ३७ प्रदेशसभा सदस्यपिन्स भाग काःगु खः। मुख्यमन्त्री महेन्द्रबहादुर शाहीं थःत प्रदेशसभाया विश्वास दु धका प्रस्तावया पक्षय् जम्मा २२ मत वःगु खःसा उगु ल्याः प्रदेशसभाय् कायम जुगु सदस्य पिनिगु ल्याखं बहुमत दुगु धका सभामुख राजबहादुर शाहीं घोषणा याःगु खः। प्रदेशसभाय् वयागु दल नेकपा माओवादी केन्द्रया १२ म्ह जक सांसद दुगु खः ।

अथेहे खुम्ह सांसद दुगु नेपाली कांग्रेसं न मुख्यमन्त्री शाहीयात विश्वासया मत बिःगु खः।

नेकपा एमालेया सांसदपि प्रकाश ज्वाला, कुर्मराज शाही, नन्दसिंह बुढा व अमर थापापिन्स मुख्यमन्त्री शाहीयात विश्वासया मत बिःगु खः ।

प्रदेशसभाया मुख्यमन्त्रीें विश्वासया मतसम्बन्धी प्रस्तावय् मतदान जुगु दिं नेकपा एमालें मुख्यमन्त्रीया विपक्षय् मतदान यायेत थःगु सांसदपिन्त ह्वीप जारी याःगु खः ।

फ्लोर क्रसयापि सांसद ज्वाला व नन्दसिंह बुढा थ्व स्वया न्ह्यः शाही नेतृत्वया मन्त्रिपरिषदय् मन्त्री जुयादीपि खः ।

Categorized in राजनीति