चीनं उइगुर मुसलिमतयेत अमानविय व्यवहार याःगु ह्यमन राइट वाचया द्वपं
चौलाथ्व अष्टमी, ११४१, वैशाख ७ मंगलबाः
चीनयात थःगु देशय् दुपिं अल्पसंख्यक उइगुर मुसलिमतय्त मानवताविरोधी व्यवहार याःगु द्वपं लाःगु दु ।
ह्युमन राइट वाचं थौंकन्हय् तिनि सार्वजनिक याःगु प्रतिवेदन कथं उत्तरपश्चिम चीनया सिन्ज्या प्रान्तय् दुपिं उइगुर मुसलिमतय्त राज्य पक्षं हे थीथी कथंया हिंसा याःगु दु ।
चीनं उइगुर व मेपिं मुसलिमतय्त मानवताविरोधी आपराधिक ज्याखँ याःगु उगु प्रतिवेदनं न्ह्यथंगु दु । अल्पसंख्यकतय्त सामुहिक रुपं हिरासतय् कायेगु, यातना बीगु, सांस्कृतिक उत्पीडन यायेगु, यौन हिंसा व वंश हे नास जुइगु अमानविय ज्याखँ याःगु प्रतिवेदनय् धयातःगु दु ।
५३ पौ ताःहाकःगु प्रतिवदेनय् चीन सरकारं अल्पसंख्यकतय्गु संरक्षण स्वयां वंश विनाशया लागिं मानवताविरोधी ज्याखँ याःगु द्वपं ब्यूगु अन्तर्राष्ट्रिय समाचार संस्थातय्सं न्ह्यथंगु द । बलपूर्वक बेपत्ता यायेगु, परिवारलिसे फायाबीगु व थाकूगु शारिरीक श्रम याकेगु लिसेंया अमानविय ज्याखँ याःगु प्रतिवेदनय् न्ह्यथनातःगु दु ।
सन् २०१७ निसें चीनं थःगु नीति क्वात्तुकुसें अल्पसंख्यकतय्त निगरानी अप्वयेकाः नियन्त्रणय् कयाः श्रम कारवाही यानावःगु धाःगु दु । अथे हे, अल्पसंख्यक मुसलिमतय् बाहुल्य दुगु क्षेत्रय् चीनं मस्जिद तोडफोड यायेगु लिसेंया ज्या याःगु नं प्रतिवदनय् धयातःगु दु ।
