२०७८ बैशाख २४, शुक्रबार

राज्य पक्षया व्यवहार जिम्मेवार खः धकाः सुनां धाइ ?

काजी | चौलाथ्व चतुर्दशी ११४१,बैसाख १३ सोमवाः

दच्छि लिपा ई हाकनं चाःहिलाः हाकनं अन हे थ्यंवःगु थें खनेदत । वंगु दँया चैत्र ११ गतेनिसें देशय् लकडाउन जुयाः सकलें छेँय् कुंकाः च्वनेमाःगु खः, कोरोनाया ग्याःचिकु दथुइ ।

हाकनं थुगु दँय् नं चैत्र ८ गतेया दिनय् वयाः स्वास्थ्य तथा जनसंख्या मन्त्रालयपाखें सभा, समारोह, सेमिनार, भेला मयाय्त इनाप यासें सुचं जारी यात । अवस्था ला अज्याःगु हे खः । सतर्कता नालेमाःगु हे ई खत । हलिंया विकशित देशय् नं धमाधम लकडाउन जुयावःगु दु । जःलाखला देय् भारतय् नं संक्रमितया संख्या झं झं अप्वयावंगु दु ।

खुला सिमा जूगु ल्याखं नं भारतय् संक्रमितया ल्याः थहांवंगुलिइ झीसं नं च्यूताः कयाच्वनेमाःगु अवस्था ला दुगु हे जुल । उकिया नापं नेपालय् नं संक्रमितया ल्याः बुलुहुँ थहांवनाच्वंगु खनेदयाच्वंगु दु । न्हूपिं संक्रमितया ल्याः ५० म्हया हाराहारीइ जक जुइधुंकूगुलिइ आः वयाः हाकनं सच्छिं च्वय् खनेदयाच्वंगु दु । थुकिं नेपालय् संक्रमणया निगूगु लहर वइला धकाः च्यूताः काय्माःगु अवस्था ब्वलंकाच्वंगु दु ।

थ्व सकतां खँया दथुइ सतर्कता आम नागरिकं जक नालेमाःगु खःला धइगु न्ह्यसः नं थनाच्वंगु दु । छुं ई न्ह्यः तत्कालीन नेकपाय् प्रचण्ड–नेपाल व ओली पक्ष दथुइ वादविवाद तच्वयाच्वंबलय् लुमंके । निगुलिं पक्षं ‘सभा धइगु गथे जिं क्यने’ धाधां मनू मुंकेगु धेंधें बल्लाः हे यात । ब्याक टु ब्याक सभा समारोह यानां तुं च्वन । सत्तारुढ दलं हे सरकारं जारी याःगु स्वास्थ्य मापदण्ड गुलि पालना यात ले सा ?

स्वास्थ्य मापदण्ड धइगु छु जनतां जक पालना याय्माःगु खःला ? कि थ्व कोरोना भाईरस धइगु सत्तारुढ दल वा ततःधंगु राजनीतिक दलं याइगु सभा समारोहयात असर मयाइगु कथंया खः ? थुकिया जवाफदेहिता राज्य पक्षयाके दु कि मदु ? न्हापा लकडाउन याःगु ई धइगु बांलाःगु हे ई खः । राज्यं इलय् हे लकडाउन याःगु खः ।

तर लकडाउनया इलय् माःगु ज्या मयाःबलय् छगू इलय् संक्रमण यक्व हे अप्वल । आः नं भ्याक्सिन इलय् हे हल धाय्मा । तर आः स्थगित जूगु दु । भारतं न्याय् धाःगु भ्याक्सिन हे वयाच्वंगु मदु । चाइनां ग्वाहालि बी धयाच्वंगु भ्याक्सिन हे हयाच्वंगु मदु । ग्वाहालि वःगु भ्याक्सिन हे छाय् महयागु धइगु न्ह्यसः ला संसदय् तकं दनेधुंकल ।

थुकिया लिसः नं राज्य पक्षं बी फयाच्वंगु मदु । महामारी थुज्वःगु अवस्थाय् नं गैर जिम्बमेवार कथंया थज्याःगु व्यवहार पक्कां पाय्छि मजू ।