कोरोना संक्रमण जुपिनिया लागि च्वछायेबःगु ज्याः
राम डंगोल | चौलागा अष्टमी ११४१,बैसाख २० सोमवाः
कोरोना महामारीया निगूगु झ्वलं आक्रान्त जुयाच्वंबलय् समुदायपाखें नं महामारी विरुद्ध ल्वायेगु पलाः न्ह्याककूगु दु । थ्वहे झ्वलय् यलःया च्यासःया व्यन्जनकार गुथीं थःगु समुदायपिनिगु लागि आइसोलेसन सेन्टर दयेकूगुदु ।
सरकार कोरोनाया ल्वःगि व वासः यायेगु ज्यालिसें आइसोलेसनया व्यवस्था यायेत कमजोर जुयाच्वंगु ईलय् समुदाय पाखें हे आइसोलेसन वार्ड व्यवस्थापनया ज्या न्ह्याःगु दु । यलःया च्यासःया व्यन्जनकारपिन्सं थःगु समुदाय पिनिगु लागि आइसोलेसन थःपिन्सं हे दयेकूगु दु ।
व्यनजनकार समुदाय दुने सुंनं कोरोना संकमण जुल धाःसा न्ह्यागु ईलय् नं उमिसं दयेकूगु आइसोलेसन छेँ वया च्वने फई । च्यासः मंका खलः व च्यासल युवा क्लब लगायतया संस्था छप्पं जुया अक्सिजनसहितया न्यागू बेडया आइसोलेसन सेन्टरया न्ह्याकूगु खः । आइसोलेसनय् सामान्य उपचारया व्यवस्था तकं दु ।
डाक्टर समिरा व्यन्जनकारं समुदाय दुनेहे कोरोना मन्यंकेत आइसोलेसनया व्यवस्था यानागु धयादिल । वय्कलं अस्पतालय् हे थें पूवंक सेवा बिइ मपूmसा संक्रमणया हुनिं अस्पतालय् वेड अभाव जुया अक्सिजन मदेक छेँ हे संक्रमित जुयाच्वने माःपिन्त धाःसा पक्का हे छुं नं ग्वःहालि जुइगु धयादिल ।
खलःया नायः श्याम व्यन्जनकार गुथि थुजागु महामारीया अवस्थाय् थःगु समुदायया लागि बः कायेगु ज्याः जुइमाःगु धयादिल । वय्कलं “जिमिगु समुदायया नितिं थुगुज्या ज्या न्ह्याका आः मेमेगु खलःपिन्सं नं थःथःगु समुदायया नितिं यायेमाःगु धयादिल ।
पक्का हे खः थथे झिगु खलः, गुथी, भ्वय् नयेगुलिइ जक सीमित मजुसे न्यनाच्वंगु महामारीया ईलय् थःगु समुदाय वा टोलवासीया नितिं व्यञ्जनकार गुथीपिन्सं थें हे ज्याः न्ह्याकल धाःसा थ्वः महामारी विरुद्धया लडाईं ल्वाय् फइगु खनेदु । अथेहे झि दक्वः नेवाःपिं छप्पं छधी जुया कोरोनायात निर्मूल यायेत छम्ह मेम्हसित ग्वहालि याना नेवाः एकताया उदाहरण बिइमाःगु खनेदु ।
