राष्ट्रपति वाइडेनया योजना
चौलागा नवमी ११४१,बैसाख २२ बुधवाः
अमेरिकी राष्ट्रपति जो बाइडेनं जइगु जुलाई ४ तक्क ७० गू प्रतिशत ल्याम्ह अमेरिकीयात कोरोना भाइरसविरुद्धया खोप तयेकेगु योजना सार्वजनिक यानादीगु दु ।
अथेहे गुलिफु याकनं १२ दँ निसें १५दँ वैंश तक्कया मस्तयेत नं खोप बिइगु न्ह्याकेगु योजनाय् दूगु राष्ट्रपति बाइडेनं धाःगु दु । अमेरिकी स्वतन्त्रता दिवस तक्क देय्या १६गू कोति ल्याम्हयात कोरोना भाइरसविरुद्धया खोपया पूर्ण मात्रा कायेगु क्वचायेकेगु न्हूगु लक्ष्य बाइडेनं क्वजिउगु खः ।
आः तक्क १०गू कोति ५०गू लख अमेरिकीं कोरोना भाइरस विरुद्धया खोप कायेधुंकुगु दु । अमेरिकाय् आः न्हिं १०गू लख मनूखं खोप कयाच्वंगु दु । तर आः े खोप कायेगु दर ३वा न्ह्यः सिवें बाब्व कुहाँवःगु दु । खोपयात कया शंका जूगु व खोप अभियानया विरोध यानाच्वंपिन्त नं थुइकेगु कुतः जुयाच्वंगु बाइडेन प्रशासनं न्ह्यथंगु दु ।
कोरोना भाइरसविरुद्धया खोप अभियानय् हलिंमय् बाँलाःगु इजरायलय् ६०गु प्रतिशत सिव्ें अप्वः मनूखं खोपया म्होतिइ छगू मात्रा काःबलय् हे संक्रमण लगभग शून्यय् कुहाँवःगु दु व अन अप्वः धैथें प्रतिबन्धत फुकुवा जूगु दु ।
आःया निला दुने देय्या स्वतन्त्रता दिवसलिसें कोरोना भाइरसं स्वतन्त्र वा मुक्त जूगु दिवस हनेगु आज्जु दूगु राष्ट्रपति बाइडेनं धाःगु दु । खोप कायेगु केन्द्रया जानकारी जूगु व खोप कायेगु प्रक्रियायात अपुकेत बाइडेनं न्हूगु वेबसाइटया तकं घोषणा याःगु दु ।
थ्वहे दथुइ अमेरिकाया फुड एण्ड ड्रग एड्मिनिस्ट्रेशन (एफडिएं) १२दँ सिवें च्वयेय्यापिन्त कोरोना भाइरसविरुद्धया फाइजरया खोप छ्यलेगु नितिं स्वीकृति बिइगु तयारी याःगु दु । उगु स्वीकृति चूलायेधुंका १२दँ निसें १५दँ तक्कयापिन्त नं खोप बिइगु योजना बाइडेनं दयेकुगु खः ।
