उपचार बाहेकया प्रायोजनाय् छेँ व थीथी उद्योगय् तयातःगु ६ हजार ४८४ गः अक्सिजन सिलिण्डर सरकारं जफत यागु दु ।

छु उद्योगी, व्यवसायीं उद्योग मन्त्रालययात थःपिन्स हे लित बिगु खःसा छु सुचका तःगु नेपाल प्रहरीें सिलिण्डर बरामद यागु खः । कोरोना भाइरसया निक्वःगु सुरु जुइवं अक्सिजन सिलिण्डरया अभाव जुगुलि उपचार बाहेकया ज्याय् सिलिण्डर मतयेत स्वास्थ्य मन्त्रालयं इनाप यागु खः ।

उकिया अनुगमन गृह मन्त्रालयया सुरक्षा, अत्यावश्यक सेवा सञ्चालन समन्वय नाप अनुगमन समितिं यागु खः । समितिया संयोजक सह–सचिव जनकराज दाहालया कथं उद्योग मन्त्रालयपाखे मार्फत ११३४ व नेपाल प्रहरीपाखे येँ, यल व ख्वपय् ५ हजार ३५० याना ६ हजार ४८४ अक्सिजन सिलिण्डर संकलन यागु दु ।

उगु सिलिण्डर थुगु अस्पताल बिइ

बिहीवाः च्वंगु समितिया बैठकं त्रिवि शिक्षण अस्पताल महाराजगञ्जय् ५०० गः, नेपाल मेडिकल कलेजय् १५० गः, वीर अस्पतालय् ३०० गः, किस्ट अस्पतालय् १०० गः, महेन्द्र निधि अस्पतालय् ६०गः, शुक्रराज ट्रपिकल तथा सरुवा रोग अस्पतालय् १३० गः, भक्तपुर अस्पतालय् १०० गः व सिभिल अस्पतालय् २०० गः सिलिण्डर बिइगु निर्णय यागु दु ।

अथेहे, समिट अस्पतालय् ४५ गः, काठमाडौं मेडिकल कलेजय् ४०० गः, पाटन अस्पतालय् २०० गः, सशस्त्र प्रहरी अस्पतालय् ३०० गः, नेपाल प्रहरी अस्पतालय् २०० गः, पिपुल्स डेन्टर कलेजय् १०० गः, लुम्बिनी प्रादेशिक अस्पतालय् १००० गः व सुदूरपश्चिम प्रादेशिक अस्पतालय् ३०० गः सिलिण्डर बिइगु निर्णय यागु दु।

Categorized in राष्ट्रिय