सघीय सांसद जीवनराम श्रेष्ठं थम्हं ५० बेड क्षमताया आइसोलेसन तयार यायेधुनागु धका धयादीगु दु ।

नेपाल सरकारं डाक्टर व नर्सया व्यवस्था यानाब्यूसा ५० शैय्याया आइसालेसन तयारी अवस्थाय् दुगु धका श्रेष्ठं धयादिगु खः। सासद श्रेष्ठं येँया स्वयम्भूस्थित आनन्दकुटी विद्यापीठया प्रयोगविहिन अवस्थाय् लानाच्वंगु भवनय् ५० बेड क्षमताया उगु आइसोलेशन दयेकादीगु खः ।

सांसद श्रेष्ठं थःगु क्षेत्र विकासया लागिं फ्याःगु ४ करोड मध्ये १ करोड ५० लाख ४० हजार तका छ्यलाः येँ क्षेत्र नम्बर ८ य् आइसोलेसन दयेकादीगु खः ।

अथेहे सांसद श्रेष्ठं थःगु क्षेत्रय् मास्क व ल्हाः सिलेगु साब्वं वितरणयात नं निरन्तरता बियाच्वनादीगु दु ।

कोरोना भाइरसबारे सचेतना थनाः चःमति, क्वयया विजेश्वरी व मखं त्वालय् यानाः ३ हजार मास्क व साब्वं इनेधुनागु श्रेष्ठं धयादिल ।

मास्क अले साब्वं वितरणया झ्वलय् १५ वडाया वडाध्यक्ष लिसें येँ महानगरपालिकाया प्रवक्ता ईश्वरमान डंगोल, सदस्य निमा घ्याम्चो, आनन्दराम गौतम, मैयाँलक्ष्मी महर्जन व अनिता परियारया नं उपस्थिती दुगु खः ।

Categorized in राष्ट्रिय