मुख्यमन्त्री पृथ्वीसुब्बा गुरुङं राजीनामा बियादिल
लहनान्यूज | चौलागा त्रयोदशी ११४१,बैसाख २६ आइतबाः
गण्डकी प्रदेशया मुख्यमन्त्री पृथ्वीसुब्बा गुरुङं राजीनामा बियादिगु दु ।
नेपाली कांग्रेस, माओवादी केन्द्र व जनता समाजवादी पार्टीं दर्ता याःगु अविश्वासया प्रस्तावय् मतदान जुइगु छन्हु न्ह्यः थौं आइतबाः मुख्यमन्त्री गुरुङं राजीनामा बियादिगु खः ।
प्रदेश प्रमुख सीताकुमारी पौडेलं आःतक्क यानादिगु ज्यायात सुभाय् देछाना दिगु दु । आः मेगु मन्त्रिपरिषद् निमस्वंतले तक्क संविधानया धारा १६९ या उपधारा (३) कथं मौजुदा मन्त्रिपरिषदं हे ज्या यायेत इनापा यानादिगु खः ।
प्रदेश प्रमुख पौडेलं आइतबाः हे संविधानया धारा १६८(२) कथं स्वन्हू दुने न्हूगु सरकार निस्वनेया नितिं राजनीतिक दलतय्त आह्वान यानादिगु दु । धारा १६८(२) सः निगू वा व सिबें अप्वः दलपिनिगु समर्थनं बहुमत दूगु प्रदेशसभा दुजःयात प्रदेश प्रमुखयात मुख्यमन्त्री नियुक्त यायेगु व्यवस्था दु ।
