जसपा अध्यक्ष महन्थ ठाकुर प्रधानमन्त्री केपी शर्मा ओलीया पक्षय् खुले जुगु दु।

प्रधानमन्त्री ओलीं सोमवाः संसदग् विश्वासया मत कायेगु इलय् ठाकुर व वयागुु पक्षया सांसदपि तटस्थ च्वंगु खः। आन्दोलनया झ्वलय् मुद्दा फिर्ता, बन्दी रिहाइ, नागरिकता, संविधान संशोधन लगायतया सवालय् प्रधानमन्त्री ओलीनाप वार्ता सकारात्मक रुपं न्ह्यावनाच्वंलि न्हुगु सरकार गठनय् सहभागी मजुइगु घोषणा यानादीगु दु।

जसपाया मेपि अध्यक्ष डा. बाबुराम भट्टराई व उपेन्द्र यादव धासा ओली नेतृत्वय् वर्तमान सरकारयात विदा बिया न्हुगु सरकार गठनया प्रयासय् खुले जुया वंगु खः । भट्टराई–यादव पक्षया सांसदपि प्रधानमन्त्री ओलीया विश्वासया मतय् विपक्ष मत बिगु खः।

नेपाली कांग्रेसया सभापति शेरबहादुर देउवा, माओवादी केन्द्रया अध्यक्ष प्रचण्ड व जसपाया अध्यक्ष उपेन्द्र यादवं राष्ट्रपति विद्यादेवी भण्डारीयात मंकाः कथं पौं च्वया संविधानया धारा ७६ या उपधारा २ कथं न्हुगु सरकार गठनया प्रक्रिया न्ह्यने यकेत इनाप यागु खः ।

राष्ट्रपति भण्डारीं न बहुमतया सरकार गठनया लागि वैशाख ३० गते तक ई बियादीगु खः ।

Categorized in राजनीति