येँ जिल्लाया कोभिड डेडिकेटेड अस्पतालया प्रमुखपिन्सं महामारीया अवस्थाय् अग्रपंक्तिइ दनाः सेवा बियाच्वंपि स्वास्थ्यकःमिपिनिगु मनोबल थकायेत छेँय् स्वयां क्वारेन्टीनय् च्वनेगु प्रबन्ध यानाबीमाःगु धाःगु दु ।

येँ महानगरपालिकाया मेयर विद्यासुन्दर शाक्यलिसे सहलह यासें अस्पतालया प्रमुखपिन्सं ज्या यायेबलय् फीमाःगु पिपिईलिसेंया सुरक्षा सामग्रीया बांलाःगु व्यवस्था यानाबीमाःगु अपेक्षा नं न्ह्यःने तःगु खः । येँ महानगरपालिकाया मेयर शाक्यं येँ जिल्लाया कोभिड डेडिकेटेड अस्पतालया प्रमुखतलिसे खँ ल्हासें महानगरं माःगु ग्वाहालि बीगु धासें छुं कथंया ग्वाहालि माः धकाः न्यनादीगु खः ।

उगु झ्वलय् अस्पताल प्रमुखपिन्सं आः अस्पतालय् अक्सिजनया अभाव जुयाच्वंगुलिइ बः ब्युसें महानगरं आःया लागिं अक्सिजन कन्सन्ट्रेटर न्यानाबीमाःगु व लिपा अक्सिजन प्लान्टत तयावनेजीगु धाःगु खः । उकिया नापं कोभिड व नन कोभिड विरामीया वासः यायेत अस्पतालय् प्राथमिकताया लिधंसाय् आकस्मिक व होल्डिङ् यानाः निगू कथंया संरचना दयेकेमाःगु खँ नं तःगु खः । नापं अस्पतालय् पोर्टेवल एक्स रे मेसिन, अल्ट्रा साउण्ड मेसिन मदुबलय् विरामीयात मेथाय् छ्वयेमाःगु जक मखसें गाक्क उपकरण मदुबलय् कोभिड व ननकोभिड विरामीया नितिं छगः हे मेसिन निसंक्रमण यानाः छ्यलेमालाच्वंगु अवस्थाया बारे जानकारी याकूगु खः ।

अथेहे उगु ज्याझ्वलय् महागनर मेयर शाक्यं मानविय क्षति पनेत दक्वं  छधी जुयाः ज्या यानाः कोभिड संक्रमण नियन्त्रणय् जायेत आह्वान यानादिल ।  ‘झीगु प्राथमिकता संक्रमण व थुकिं जुइगु मानवीय क्षति पनेगु खः । थुकिया लागिं छिकपिन्त माःगु थप स्रोतय् जिमिसं ग्वाहालि याये, छु गुकथंया ग्वाहालि माः धयादिसँ’ शाक्यं धयादिल ।

मेगु थप संयन्त्र दयेकाः स्वयां अस्पतालया क्षमता थकयाः महामारी नियन्त्रण याये अःपुइगु वयकःया धापू खः । अस्पताल वनेम्वाःपिं विरामीत नं आत्ते चायाः अस्पतालय् च्वंवनाब्यूबलय् अस्पतालय् चाप अप्वःगु चर्चा शाक्यं यानादिल ।

उगु सहलहय् त्रि. वि. शिक्षण अस्पतालया कार्यकारी निर्देशक डा. दिनेश काफ्ले, सहिद गंगालाल राष्ट्रिय हृदय केन्द्रया कार्यकारी निर्देशक डा. चन्द्रमणि अधिकारी, शुक्रराज ट्रपिकल सरुवा रोग अस्पतालया निर्देशक डा. सागरकुमार राजभण्डारी, निजामति कर्मचारी अस्पतालया निर्देशक डा. विधाननिधि पौडेल व डा. विमलकुमार थापालिसेंया चिकित्सकं थःथःगु बिचाः तयादीगु खः ।

Categorized in राष्ट्रिय