८० दँ लिपा यलया जीवित देवी कुमारीया आसन ह्यूगु दु।

जीवित देवी कुमारी न्हिन्हि नियमित पुजा यायेत बिराजमान जुयाबिज्याइगु आसन जीर्ण जुगुलि अथेहे ह्यूगु खः ।

ललितपुर महानगरपालिका– १६ वडा कार्यालयं न्हुगु आसन ग्वाहालि यागु खः । लुँ व वहा लेपन याना कलात्मक आसन वरिष्ठ कलाकार प्रचण्ड शाक्यं तयार यानादीगु खः । आःयागु आसन नेपाल संवत् १०६१ य् हर्खराज बज्राचार्य व वयकःया परिवारं दयकूगु खः।

न्हुगु आसन थौं बिहीवाः रत्नाकर महाविहार हःख बहालय् छगु धार्मिक पुजा याना हस्तान्तरण यागु खः । न्हुगु आसनय् थौंकन्ह्य कुमारी जुयाबिज्याम्ह निहिरा बज्राचार्य बिराजमान जुयादीइ । थौं छगु ज्याझ्वः दथुइ रत्नाकर महाविहारय् कुमारी द्यःछेँय् जीवितद्यः कुमारीयात न्हापागु पटक न्हुगु आसनय् विराजमान याकुगु खः । वस्वया न्ह्यः महाविहारय् गुरुजु (बेताजु) बुद्धरत्न बज्राचार्यं संकल्प व पञ्चोपचार पुजा यागु खः।

वयालिपा वडापाखे वडा सदस्य सुप्रभा शाक्यं विहारया ज्येष्ठ सदस्य चक्रेश्वर आजु (ज्येष्ठ) ज्ञानबहादुर बज्राचार्य व सिद्धिरत्न बज्राचार्यं आसन हस्तान्तरण यानादीगु खः। थुगुु आसनया लागत ७ लाख ५० हजार रुपैयाँ खः । यल वडा १६ कार्यालयं वंगु दँय कार्तिक नाचया मुख्य आकर्षक बाराही व नरसिह अवतार नाचया कलाकारपिन्स पुइगु कलात्मक न्हुगु मुकुट प्रदान यागु खः ।

वडां संस्कृति सम्पदा क्षेत्रय् तधगु प्राथमिकता बिया ज्यायाना वयाच्वनागु दु धका वडा सदस्य शाक्यं धयादीगु खः। 

Categorized in राष्ट्रिय