टेकु अस्पताल व छत्रपाटी निःशुल्क चिकित्सालययात येँ महानगरं भेन्टिलेटर लल्हात
शोभा श्रेष्ठ | कछलाथ्व एकादशी ११४१,जेष्ठ ८ सनिवाः
येँ महानगरपालिकां शुक्रराज ट्रपिकल अस्पताल टेकु व छत्रपाटी निःशुल्क चिकित्सालय,क्षत्रपाटीयात निगः निगः भीजी ७० मोडलया भेन्टिलेटर लल्हागु दु।
येँ महानगरया प्रमुख विद्यासुन्दर शाक्यया रोहवरय् जनस्वास्थ्य विभागया प्रमुख हरिबहादुर कुँवर व अस्पतालया निर्देशक दथुइ सम्झौता यासे उपकरण लल्हागु खः।
येँ महानगरपालिकायात उगु उपकरण भगिनी सहर तिव्वतया ल्हासां महामारी विरुद्धया ल्वायेत छ्वया हःगु खः । येँ महानगरं आः मेथु ज्या त्वता मनू तयेगु जीवन बचे यायेगुलि बिचाः यायेमा धका महानगरया उपप्रमुख हरिप्रभा खड्गी श्रेष्ठं धयादीगु खः ।
अथेहे छत्रपाटी निःशुल्क चिकित्सालयया अध्यक्ष डा. मनोजमान श्रेष्ठं थःपिनिगु अस्पतालय् कोविड अस्पताल दयकेगु लागि थुगु ग्वाहालि तसक च्वछाय् बः जू धका धयादीगु खः। छत्रपाटी चिकित्सालय महानगरया कोविड अस्पताल खः ।
आः सञ्चालन यायेगु अन्तिम तयारी जुइ धुकुगु दु । चिकित्सालयया अध्यक्ष डा.श्रेष्ठं येँ महानगरं थ्व स्वया न्ह्यः सरकारी व सामुदायिक याना १२ गु अस्पतालय् कोविड उपचारया क्षमता अप्वोकेत थीथी ग्वाहालि याये धुकुगु दु ।
Categorized in राष्ट्रिय
