नेपाल व खनाललिसें ११म्ह नेता एमालेपाखें निष्कासित
लहानान्युज | कछलाथ्व त्रयोदशी ११४१,जेष्ठ १० सोमवाः
नेकपा एमालें पार्टीया वरिष्ठ नेता माधवकुमार नेपाल व झलनाथ खनाललिसें ११म्ह नेतापिन्त साधारण दुजः तकं मदयेक निष्कासन याःगु दु ।
प्रधानमन्त्री निवास बालुवाटारय् सोमबाः एमाले स्थायी समिति मुँज्यां वंगु शनिबाः स्पष्टिकरण फ्वंपिं २३म्ह मध्ये नेपाल व खनाललिसें ११म्ह दुजःपिन्त साधारण दुजः तकं मदयेक निष्कासन यायेगु निर्णय याःगु खः ।
अथेहे १२म्हेसित २४घौया स्पष्टिकरण कायेगु नं निर्णय याःगु दु । निस्काशित जूपिं नेतापिंलय् माधवकुमार नेपाल, झलनाथ खनाल, भीम रावल, मुकुन्द न्यौपाने, रामकुमारी झाँक्री, कलिला खातुन, लक्ष्मी चौधरी, पुष्पाकुमारी कर्ण, सरला यादव, निरादेवी जैरु व कल्याणी खड्का जुयादि ।
कांग्रेस सभापति शेरबहादुर देउवायात प्रधानमन्त्री दयेकेत ल्हाचिं वियागुलिं उमित स्पष्टिकरण काःगु खः । अथेहे २४घौ या स्पष्टिकरणय् घनश्यान भुसाल, सुरेन्द्र पाण्डे, कृष्णलाल महर्जन, जीवनराम श्रेष्ठ, झपट रावल, दिपकप्रकाश भट्ट, नारायण खतिवडा, भवानीप्रसाद खापुङ, मेटमणि चौधरी, यज्ञराज सुनुवार, विरोध खतिवडा व सोमप्रसाद पाण्डे लाःगु दु ।
अथेहे मुँज्यां सुदूरपश्चिम सरकारयात बियावयाच्वंगु समर्थन नं लितकायेगु निर्णय याःगु दु । एमालें समर्थन लितकायेवं सुदूरपश्चिमया मूख्यमन्त्री त्रिलोचन भट्टया सरकार अल्पमतय् लाःगु दु ।
Categorized in राजनीति
