महामारी विरुद्धया अभियान सकसिगु खः, सकसिगु सहकार्यपाखे थुकियात नियन्त्रण याये :मेयर शाक्य
रसिया श्रेष्ठ | कछलागा अष्टमी ११४१,जेष्ठ २० बिहीवाः
येँ महानगरपालिकां थौं छत्रपाटी निःशुल्क चिकित्सालय (महानगरया विशेष कोविड अस्पताल) यात थप निगः भेन्टिलेटर लल्हागु दु।
महानगरया मेयर विद्यासुन्दर शाक्य, उपमेयर हरिप्रभा खड्गी श्रेष्ठं अस्पतालया अध्यक्ष डा. मनोजमान श्रेष्ठयात उपकरण हस्तान्तरण यागु खः। थ्व स्वया न्ह्यः जेठ ८ गते भीजी ७० मोडलया निगः भेन्टिलेटर बिगु खः। थुगु भेन्टिलेटर महानगरया भगिनी सहर ल्हासां बिगु खः। थौं हस्तान्तरण यागु भेन्टिलेटर महानगरया अनुदानं अस्पतालं न्यागू खः। जर्मनय् उत्पादन जुगु थुगु उपकरण छगःया करीब २६ लाख ५० हजार तका तुगु धका अस्पतालं धागु दु।
उपकरण हस्तान्तरण ज्याझ्वलय् मेयर शाक्यं, आः कोविड नियन्त्रण अभियानय् समुदायनिसे सरकार तक दक्को संयन्त्र छ थाय् च्वना ज्यायायेमाः धका धागु दु। न्ह्याः थाय च्वनासा, संक्रमण घटे यायेगु व उपचार यायेमाःपिन्त गुणस्तरीय सेवा बिइत महानगर केन्द्रीत दु। मेयर शाक्यं धयादीगु दु, ‘कोविड नियन्त्रणया लागि कम लगानीइ यक्को प्रतिफल प्राप्त यायेफु महानगरं सरकारी व सामुदायिक अस्पताल नाप सहकार्य यानागु दु।
थुकिइ संक्रमण जूपि मनूतयत याउक उपचार याये दयेमाःगु जिमिगु अपेक्षा दु। कोविड संक्रमणय् दुपि विरामीया व्यवस्थापनया लागि महानगरं यागु कुतःया बारेय् धयादीगु दु, ‘महानगरया मातहतय् दुगु १४ गु आइसोलेसन सेन्टरय् ५७४ गु वेड मध्ये थौं सुथय् तक १४३ वेडय् विरामीपि दु। माःपिन्स थःगु वडाध्यक्षयात सम्पर्क याना निःशुल्क खाना व उपचार याये फइ धका धागु दु।’
अस्पतालय् आः कोविड जूपि अक्सिजन बिइमापि न्याम्ह विरामी एचडीयूय् व गुम्ह विरामी साधारण वेडय् उपचार याना च्वंगु दु। महानगरया कोविड अस्पतालया बारेय् जानकारी बियादीसे अस्पतालया अध्यक्ष डा. मनोजमान श्रेष्ठं धयादीगु दु, ‘कोविड उपचारया लागि नर्सिङ् स्टाफपि यक्को मागु खः। थुकिया लागि जिमिसं अनुभवी नर्सपिन्त साथ कयागु दु।’ उगु ज्याझ्वलय् महानगरया वडाध्यक्षपि, कार्यपालिका सदस्यपि व वडा सदस्यपिनिगु न सहभागी दुगु दु।
Categorized in राष्ट्रिय
