भौतिक पूर्वाधार तथा सहरी विकास मन्त्री अम्मरबहादुर थापाया राजीनामा माग यासे एमाले न कर्णाली प्रदेशसभा बैठक अवरुद्ध यागु दु।

सोमवाः निसे सुरु जुगु प्रदेशसभाया च्याक्वंगु अधिवेशनया न्हापागु बैठकं सभामुखया कार्यसूची न्ह्यने मयकेत एमाले सांसदपिन्स दना विरोध यागु खः।

एमाले प्रदेश संसदीय दलया नेता यामलाल कँडेलं फौजदारी अभियोग प्रमाणित जुम्ह मनूयात मन्त्री दयकूगु धासे थापाया राजीनामा फ्वंगु खः। अपराध पुष्टि जुइ धुकुम्ह मनू सार्वजनिक पदय् च्वने मदुगु तर्क तया नेता कँडेलं सरकारया निर्णय मभिंकुगु तले बैठक न्ह्यने यके दइमखु धका धागु दु।

पार्टीया ह्वीप विपरित मुख्यमन्त्री महेन्द्रबहादुर शाहीयात मत बिगुलि वयात वैशाख ४ गते मन्त्री दयकूगु खः। एमालेया अवरोध लिपा सभामुख राजबहादुर शाहीं बैठक आधा घण्टाया लागि स्थगित यागु खः।

Categorized in राजनीति