किपू नगरपालिकायात सांस्कृतिक संरक्षित क्षेत्र घोषणा यायेमाःगु माग
लहानान्युज | बछलाथ्व नवमी ११४१,असार ५ सनिवाः

किपुलिइ क्रियाशील न्ह्यगु संगठनं मंकाः कथं किपू नगरपालिकायात वइगु नगरसभां सांस्कृतिक संरक्षित क्षेत्र घोषणा यायेगु नीति पारित यानाः कार्यान्वय यायेगु नितिं माग याःगु दु।
किपू नगरपालिकाया उपमेयर सरस्वती खड्का रिजालयात हलिं नेवाः गुथि केन्द्र, नेवाः देय् दबू किपू नगर समिति, आदिवासी नेवाः जागरण अभियान किपू, हलिं नेवाः गुथि किपू, नेवाः विद्यार्थी युनियन, हलिं नेवाः गुथि अमल्सि व हलिं नेवाः गुथि गःछेँ कचां माग याःगु खः। किपू नगरपालिकां निस्वंगु सांस्कृतिक संरक्षित क्षेत्र घोषणा यानाः कार्यदलया प्रतिवेदन व प्रस्तावित ऐनयात वइगु नगरसभां पारित यानाः कार्यान्वय यायेगु नितिं माग यासें उगु पौ लःल्हाःगु खः।
किपू नगरया उपमेयर खड्कां नगरसभाय् सांस्कृतिक संरक्षित क्षेत्र घोषणाया प्रस्ताव यंकेगु प्रतिबद्धता प्वंकूगु खः। उगु पतिइ, ‘किपू नगरपालिकां नीस्वंगु किपू सांस्कृतिक संरक्षित क्षेत्र घोषणा अध्ययन कार्यदलं जेठ ११ गते पेस याःगु प्रतिवेदन व किपू नगर सांस्कृतिक संरक्षित क्षेत्र सम्बन्धी व्यवस्था यायेत दयेकूगु ऐन २०७८ सम्बन्धय् जिपिं आबद्ध तपशिल संघ संस्थाया सरोकार सम्बन्ध दूगुलिं उगु ऐन किपू नगर समुदायया बृहत्तर हित अनूकुल खनेदूगुलिं उगु ऐन वइगु नगरसभा नगर परिषदय् पेश यानाः पारित यायेगु व कार्यान्वयन यायेत दुनुगलंनिसें इनाप यानाच्वना ।’
Categorized in राष्ट्रिय