जातिय भेदभाव द्वपं लाःम्ह प्रधानं सुनारयात कारबाहीया माग यासें आयोगय् निवदेन बिल
बछलागा सप्तमी ११४१, असार १७ बिहिवाः
जातिय भेदभाव अले छुवाछुतया द्वपं लाःम्ह सरस्वती प्रधानं सञ्चारकःमि रुपा सुनारयात कारबाहीया माग यानादीगु दु ।
थम्हं छुवाछुत व विभेदकारी व्यवहार मयानासां षड्यन्त्रमुलक तरिकां थःत फसे याःगु दाबी यासें रुपा सुनारलिसेंयात कारबाहीया माग यासें प्रधानं राष्ट्रिय मानवअधिकार आयोगय् निवदेन बियादीगु खः ।
वय्कलं रुपा सुनारयात कोथा मालेत ग्वाहालि याःपिं सुष्मा राई व सिर्जना राईयात नं कारबाहीया माग यानादीगु दु । वंगु असार १ गते थःत दलित जूगु हे हुनिं क्वथा मब्यूगु धासें सुनारं प्रहरी वृत्तय् उजुरी ब्यूगुलिसें प्रधानयात प्रहरीं स्वन्हु हिरासतय् तयाः अनुसन्धान याःगु खः ।
प्रधानं निषेधाज्ञाया इलय् पीसीआर रिपोर्ट विना क्वथा मालाजुयाः महामारी न्यंकेत स्वःगु, अपराधिक ज्याया लागिं क्वथा म्वाःगु खःसां क्वथा मालाजूगु व थःगु मञ्जुरी मदय्क फोन रेकर्ड याःगु धासें कारबाहीया माग यानादीगु खः ।
अथेहे, प्रधानं सञ्चारकःमि सुनारं सञ्चारकःमिया दसिपौ दुरुपयोग याःगु द्वपं नं बियादीगु दु । छेँथुवाः थः जहान व माजु खःगु धासें वय्कलं थःत छेँ बालं बीगु अधिकार मदुगु स्पष्ट यानादीगु दु ।
Categorized in राष्ट्रिय
