नेकपा एमालेया बैठकय् सहभागी जुइत वरिष्ठ नेतापि झलनाथ खनाल व माधवकुमार नेपालयात नाप सकसित पौं छ्वःगु दु।

एमाले केन्द्रीय कमिटीया बैठक शुक्रवाः सुथय् ११ बजे सःतूगु दु। झीक्वःगु राष्ट्रिय महाधिवेशन आयोजक कमिटी खारेज जुगुलि न्हापागु पटक केन्द्रीय कमिटी बैठक सःतूगु खः।

अध्यक्ष केपी शर्मा ओलीं थ्व स्वया न्ह्यः छु भचा बाहेक अधिकांश बैठकय् माधव नेपाल समूहया नेतापि सःतूगु मदु। तर शुक्रवाःया बैठकय् सकसित पौं छ्वयागु दु धका केन्द्रीय कार्यालय सचिव शेरबहादुर तामाङं धागु दु।

झीक्वःगु राष्ट्रिय महाधिवेशन आयोजक कमिटी खारेज जुइवं नेता खनाल व नेपाल नाप ११ म्हेसित यागु कारबाही स्वतः निष्प्रभावी जुगु अध्यक्ष ओलीं जानकारी बिगु खः।

माधव समूह अनुपस्थित जूसा अध्यक्ष ओलीं एमाले दुपि पूर्वमाओवादी नेता व ३ जेठ २०७५ य् पार्टी एकता जुगुलि थप जुपि नेतापिन्त केन्द्रीय कमिटीइ मनोनित यागु दु।

Categorized in राजनीति