अपर तामाकोसी जलविद्युत् आयोजनां थौंनिसें बिजुली उत्पादन याइगु
बछलागाः एकादशी ११४१, असार २१ गते सोमबाः
अपर तामाकोसी जलविद्युत् आयोजनां थौंनिसें बिजुली उत्पादन याइगु जूगु दु ।
राष्ट्रिय गौरवया आयोजना धयातःगु कूल ४५६ मेगावाट क्षमताया अपर तामाकोसीया न्हापांगु युनिटं बिजुली उत्पादन यायेत्यंगु दु ।
प्रधानमन्त्री केपी शर्मा ओलीं थौं न्हिनय् ४ताः ईलय् भर्चुअल प्रविधिया माध्यमं आयोजनाया उलेज्या याइगु ज्याझ्वः क्वःज्यूगु दु । आयोजनाया प्रवक्ता डा. गणेश न्यौपानेया कथं न्हापांगु युनिटया क्षमता ७६गू मेगावाट दु ।
प्रणालीया मागकथं बिजुली उत्पादन जुइगु प्रवक्ता न्यौपानें जानकारी बियादिल । आयोजनां म्हिगः विद्युत् गृहदुगु गोगरनिसें खिम्तीतयका कूल ४७गू फुती २गू किलोमिटर ताःहाकःगु २२०गू केभी क्षमताया प्रसारण लाइनय् बिजुली छ्वयाः चार्ज याःगु खः ।
आयोजनां शनिवाः ढल्केबरनिसें न्यू खिम्ती सवस्टेशनदथुइया लाइन न चार्ज याःगु खः । आयोजनापाखें उत्पादन जुइगु बिजुली विद्युत्गृह दुगु गोगरं न्यू खिम्ती सवस्टेशन जुयाः ढल्केबर थ्यनि ।
आयोजनां उत्पादन जुइगु बिजुली राष्ट्रिय प्रशारणय् स्वायेत असार १३ गतेनिसें १९ गतेतका माःकथंया तयारी याःगु खः ।
Categorized in राष्ट्रिय
