अवैध कथं नेपाः दुथ्यागु मोबाइल साउननिसें बन्द जुइगु
बछलागा चतुर्दशी ११४१,असार २४ बिहीवाः
साउन १ गतेनिसें अवैध रूपय् नेपालय् हयाःतःगु मोबाइल सेटत चले मजुइगु । आवलिं मोबाइल सेटत दूरसञ्चार प्राधिकरणय् दर्ता यानाः जक चले यायेदइगु जूगु दु । तर न्हापांनिसें छ्यलाःच्वंगु मोबाइलया हकय् धाःसा थ्व नियम लागू मजुइगु धाःगु दु ।
नेपाल दूरसञ्चार प्राधिकरणं राजस्व छली यानाः नेपालय् हयातःगु मोबाइल–सेटयात नियन्त्रण याइगु जूगु दु । आवलिं रजिस्ट्रेसन अनिवार्य याइगु धागु दु । आपराधिक क्रियाकलाप नियन्त्रण यायेत अले राज्ययात राजस्वय् तिबः जुइकेत थन्यागु नियमयात कडा यानाः लागू यायेत्यंगु प्राधिकरणया प्रवक्ता सन्तोष पौडेलं जानकारी बियादिल ।
पौडेलया कथं विदेशं तप्यंक्क न्यानाहःगु मोबाइल प्राधिकरणया अनलाइनय् रजिस्टर यायेवं जक चले जुइकथं न्हूगु व्यवस्था यायेत्यंगु दु । आः चले जुयाच्वंगु मोबाइलया हकय् धाःसा थ्व नियम लागू मजूसां साउन एक गतेलिपा छ्यलीगु मोबाइलय् थ्व नियम लागू जुइ । प्राधिकरणया नियमबारे मोबाइल छ्यलीपिनिगु थन्यागु प्रतिक्रिया दु ।
नेपालय् न्यानाहःगु मोबाइल फोन नेपाः दुकाइगु कम्पनीं रजिस्टर याइगु जूगुलिं उकिया फुक्क जानकारी प्राधिकरणनाप दइ । तर व्यक्तिगत रुपय् हःगु मोबाइलया विषयलय् छुं न कथंया जानकारी मदयाः अन्यागु फोनमार्फत आपराधिक ज्यापहः जुयाच्वंगु खनेदु । अथेजुयाः आपराधिक ज्यापहः नियन्त्रण यायेत न रजिस्ट्रेसन अनिवार्य यायेमाःगु धागु दु ।
Categorized in राष्ट्रिय
