ब्राजिलयात पराजित यासे अर्जेन्टिनां कोपा अमेरिकाया उपाधि त्याकूगु दु।

रियो दि जेनेरियो माराकाना स्टेडियमय् थौं आइतवाः सुथय् जुगु कासाय् ब्राजिलयात १–० गोलं पराजित यासे अर्जेन्टिनां २८ दँ लिपा कोपा अमेरिकाया उपाधि ल्हातय् लाकूगु दु।

अर्जेन्टिनाया लागि कासाया २२ गु मिनेटय् एन्जल डि मारियां गोल यागु खः। उगु गोल हे कासाया उपाधि त्याकेगु लागि निर्णायक जुगु खः। रोड्रिगो डे पउलं बिगु पासय् डि मारियां अफसाइट ट्रयाप बिट यासे गोलकिपर नाप वान भर्सेस वानया अवस्थाय् चिप यासे गोल यागु खः।

सन् १९९३ य् मेक्सिकोयात पराजित यासे अर्जेन्टिनां कोपा जितेयता २८ दँ लिपा तक उपाधिविहीन जुगु खः । अर्जेन्टिना प्यक तक कोपा व छकः विश्वकप फाइनलय् थ्यका पराजित जुगु दु।

Categorized in कासा