इंग्ल्याण्डपाखें पाकिस्तान विरुद्धया श्रृंखला क्लीन स्वीप
दिल्लाथ्व चतुर्थी ११४१,असार ३० बुधवाः
पाकिस्तान विरुद्धया एक दिवसिय क्रिकेट श्रृंखला इंग्ल्यान्डं क्लिन स्विप याःगु दु ।
वंगु चान्हय् जूगु ३गूगु व लिपांगु छगू दिवसीय कासाय् पाकिस्तानयात ३गू विकेटं बुका घरेलु टिम इंग्ल्यान्डं श्रृंखला ३–० या ल्याःखं त्याकुगु खः । बर्मीङ्घमय् टस बुना न्हापा ब्याटिङ याःगु पाकिस्तानं ५०गू ओभरय् ९गू विकेट तंका ३सः व ३१गू रन दयेकुगु खः ।
इमिगु नितिं कप्तान बाबर आजमं सच्छि व ५८गू रनया शतकीय इनिङ्स म्हितुगु खः । मोहमद रिजवानं ७४गू रन मुंगु खःसा इमाम उल हकं ५६गू रनया योगदान बिल । बलिङपाखे इंग्ल्यान्डया ब्रेडन कार्सें ५ गू व सकिब मोहमुदं ३ गू विकेट काःगु खः ।
लिसःलय् ३ सः व ३२गू रनया तःधंगु आज्जु इंग्ल्यान्डं ४८गु ओभरय् ७गू विकेट तंका पूवंकुगु खः । इंग्ल्यान्ड त्यागुलिइ जेम्स भिन्सया सच्छि व २गू रन अले लेविस ग्रेगोरीया ७७ गू रन महत्वपूर्ण जुल । पाकिस्तानया हरिस राउफं ४गू विकेट काल ।
आः इंग्ल्यान्ड व पाकिस्तान दथुइ कन्हय्निसें ३गू कासाया ट्वेन्टी ट्वेन्टी श्रृंखला न्ह्याइगु जूगु दु ।
Categorized in कासा
